الثلاثاء، 9 أغسطس 2011

إذا لم تقرأ هذه المقالة فستحل عليك لعنة الفراعنة !!

زيييييي عااااااااااا هووووووووووووووووووو نييييييييييي  رررررررررررررععععععععععععععع

نعم ؟! بتسألوني بعمل ايه ؟!

بحضر التعويذة اللي هسحركم بيها ياللي مش هتقروا المقالة طبعًا !!

فاكريني بهزر و لا ايه ؟!

النهارده أنا هكلمكم عن حاجة مزعجة أوي أكيد حصلت لكم مرة على الأقل !

هكلمكم عن الرسايل المملة اللزجة اللي بتوصلك على الايميل (و حاليًا على الفيس بوك) و التي عادةً ما تهددك و توعدك إذا لم ترسلها

بإنك ستموت و هيتحط السيخ المحمي في صرصور ودنك و تروح النار !

أيوا ...

بكلمكم عن الرسائل الدينية العجيبة التي تصلك للايميل !

لو كنت تعتقد أن هذه الرسائل حقيقية و مقصود بها الخير حقًا و دون أي هدف من وراءها و لست مستعدًا لتغيير وجهة نظرك هذه ...

أو غير مقتنع تمامـًا بنظرية المؤامرة و حاسس إنها مجرد (تلكيكة) و اختراع فاشل ...

فاطلع بسرعة فوق ... حرك الماوس لليمين ...

شايف الشريط الأزرق دا ؟

شايف علامة الاكس الحمرا دي ؟

أيوا يا حلاوة ... اضغط عليها و أوبااا ... خرجت من الصفحة خالص !!

 ..........................................

نعم ؟ بتقولوا مش بتكلم ليه ؟ 

مستنية الناس اللي مش عاجبها تخرج ..أصلهم مش هيخرجوا بسهولة  كدا ...

هيمرروا الـScroll bar الأول و يتفرجوا على المقالة من النص و لو في صور و بعدين يقروا آخر كلمتين و يمكن أول و آخر 

تعليق و بعدين يطلعوا ! 

فمستنيه يخلصوا :)

ها؟ خلاص ؟!

طب تمام  .. بالمناسبة لو انت مشغول ما تقراش دلوقتي لأن المقالة محتاجة صحصحة ...

نبدأ بقه بسم الله الرحمن الرحيم ...

رسائل من نوع

( انشرها لو انت مسلم و في خلال 20 يوم هتسمع خبر حلو  و لو ما نشرتهاش هتسمع خبر وحش خلال -برضو-20يوم)

(قول ورايا أقسم بالله العظيم أن أرسل هذه الرسالة لـكل من عندي)

(انشرها لو انت مسلم حقيقي )

(انشرها لو عايز تدخل الجنة)

إلخ إلخ إلخ

رسائل تحمل تقريبـًا نفس المعنى و المضمون ...

يا إما دعاء يا إما نصيحة غالية يا إما صورة جرافيك مضروبة على الفوتوشوب لبصلة عليها اسم الله و (و هذا المهم) رسالة تقول 

(حلمت فتاة فلسطينية "لو حطوا لها اسم غالبـًا بيبقى أسماء" حلمت بالرسول عليه أفضل الصلاة و السلام و طلبت مني أن أرسل هذه الرسالة لـ30 شخص و سأسمع خبرًا سعيدًا خلال 20 يوم و إذا لم أنشرها فستستمع خبرًا سيئـًا)

و أُسقط الأمر في يدك ... فإما أن تــُرسل و تستمتع بالنعيم الأبدي و إلا هتتعلق من عرقوبك  !

المشكلة إني من محبي المخاطرة المحسوبة سلفـًا ... ففي مرة أرسلت الرسالة و مرة أخرى لم أرسلها و كنت أحسب كل يوم بميعاده

و لم يحدث شيء !!

لا جيد و لا سيء !!!!

ثم بدأت أفقد اهتمامي بهذه الرسائل و أعتبرها نوع من الخداع و بعد سنوات وصلتني رسالة مرعبة على الايميل

تكذب كل هذه الرسائل و توضح مصدرها !!!

و قبل أن تتهموني بالمبالغة ، فنفس الرسالة تقريبًا تصل إلى صديقاتي المسيحيات !

مع تغيير اسم الفتاة لو كان أسماء إلى مريان و تغيير حلم الرسول بحلم القديس مرقس !!!

و بنفس الصيغة الغامضة تقريبًـا  !!

و قبل أن أقوم بكتابة هذه المقالة ، سألت صديقتي المسيحية و التي أثق فيها جدًا (و هقول اسمها هنا HoOt Smile )


، فأجابتني (دا هطل !)

يعني الموضوع فعلاً أي كلام !!

نعود لفحوى الرسالة التي وصلتني !!

كانت الرسالة تتكلم عن منتدى للملحدين يقومون فيه بصنع هذه الأكاذيب و ترويجها في المواقع العربية !

طبعًا هم يتحدثون العربية (و إن كانت فصحى أكثر من اللازم و لا تظهر فيها بوادر اللهجة المحلية

و كأنهم شخصيات آلية أو قادمين من كوكب الأكشن في سبيس توون ! )

المصيبة الكبرى ، إنني تجرأت و فتحت الموقع ... فوجدته مفتوحــًا !!

يعني لم يتم حجبه !

حتى في السعودية و دول الخليج و المغرب العربي كان يعمل !!

أي أن أحدًا لم ينتبه له مطلــقــًا !!

طيب ، بيعملوا في الموقع دا ايه يا عتريسة ؟

هقولك يا سيدي ...

هذا المنتدى متخصص في "فبركة" الصور و المواضيع الدينية العجيبة ...

فتارة يأخذون صورة لتفجيرات 11 سبتمبر و يغيرون من شكل السحاب ليكتب كلمة (الله) ..

و تارة يكتبون على البيض اسم (الله) و هذه معجزة !!!!!!!!!!!!!!!

و تتولى مجموعة منهم النشر في المواقع و المنتديات العربية و الإسلامية مثل هذه الأكاذيب ...

و من التجارب التي قامت الرسالة برصدها ، فبعد وضع هؤلاء الملاحدة لموضوع واحد في منتدى عربي واحد ...

مرت ثلاثة دقائق ، فوجدوا جوجل يمتليء بهذا الموضوع عندما كتبوا الاسم في خانة البحث !!!

و بدأ الملاحدة في السخرية من الاسلام و من العرب و من جهلهم و نشرهم لأي شيء يجدونه في المواقع الاسلامية على الانترنت 

بدون تحقق كافٍ !!

و يبدو أن الملاحدة لم يكتفوا من السخرية فقط من الدين الاسلامي ... فطالت أيديهم الدين المسيحي أيـضــًا و بدأت مثل هذه المواضيع

تتغير طريقتها الاسلامية للطريقة المسيحية مؤخرًا !!!

حد عبقري دلوقتي هيجي يسألني ... طب هم بيعرفوا ديننا كدا ازاي ؟ و بيتكلموا عربي ازاي ؟

هقولك ، ما تنساشس إن في دولة غير شقيقة لازقة فيك بتعلم العربية في مدارسها !!

و موضوع البحث في الأديان أصبح سهلاً في عصر العولمة الحديثة و الكمبيوتر و الانترنت و بكل اللغات !

و لا تنسى أن الملاحدة موجودون في كل مكان حتى و لو لم يظهروا للعيان !

طب و هيستفيدوا من الكلام دا ؟

كتيييييييييييييييييييييييييييييييييييييييييييييييييييييييييييييييييير 

أيوا و الله بيستفيدوا !

أولاً ، الإلهاء ... بمعنى إنهم هيشغلوا بالك كل شوية بمثل هذه المواضيع الفارغة و يستغلوا خوفك من العقاب في الآخرة عشان تنشر 

هذه الأكاذيب  (تذكر أنهم لا يؤمنوا بوجود إله أصلاً و لا في دماغهم عقاب إلهي).

ثانيـًا ، السخرية من المسلمين و إظهارهم بمظهر الأبله الذي يسعى للجنة بمجرد إرسال رسالة إلكترونية و ينسى العمل و الاجتهاد !

ثالـثــًا ، معرفة ايميلك الالكتروني مما يسهل من عمليات الاختراق .

هتسألني ، طب بيعرفوا ايميلي ازاي يا عتريسة ؟

هقولك بسيطة جدًا ، شايف لما بتيجي تعمل Forward لايميل ؟

مش في حاجة اسمها TO و Bcc و  CC

غالبـًا المبتدئين في استخدام الانترنت أو اللي معندهمش وقت بيكتبوا الايميلات المطلوب الإرسال إليها في To

و عشان كدا ممكن تلاقي ايميلات غريبة كتير بتضيفك و بتبعت لك رسايل بعد كدا !

ايه السبب ؟

السبب انه حضرتك لما بتكتب الايميلات المطلوبة بتكتبها في خانة To  اللي بيخليها تظهر في كل ايميل هيتبعت له

بمعنى .. لو أنا عايزة أبعت الرسالة دي لـ(سلمى ، أسماء ، عمر ، طارق)  بافتراض إن الأربعة ما يعرفوش بعض بس أصحابي

هقوم راحة و كاتبة ايميلاتهم كلها في خانة To و أبعت ...

ممكن (طارق) دا يقوم واخد ايميلات (سلمى و أسماء) و يضيفهما عنده .. و تبدأ (أسماء) و (سلمى) يسألوا ...

هو جاب ايميلي منين ؟ هو اخترق حسابي على المنتدى و جابهم و لا ايه ؟ طب دخل على حسابي على الفيس بوك ؟ 

بس أنا عاملة ايميلي مخفي !!

الفكرة ، إن طارق كان ذكي بما يكفي إنه ياخد الايميل من رسالتي و يضيفه من غير اختراق و لا غيره !

و لحل هذه المشكلة يمكنك إرسال الرسالة لايميلات مختلفة بزر الـ(CC) الذي يخفي كل ايميلات الأشخاص المرسل إليه ماعدا ايميلك !

و دي نفس الطريقة اللي بتعتمد عليها الجروبات اللي بتبعت لك كل فترة (خاصة غير معلومة المصدر) ...

فتلاقي كاتبين حوالي 50 ايميل في الرسالة و انت ما تعرفش منهم غير كام واحد أو ما تعرفش فيهم حد خالص !!

و في بعض الدول خاصة الولايات المـِتحدة (و من يتابع برامج الجرائم يعرف ما سأقوله جيدًا) يمكنهم تتبع الجهاز عن طريق 

رقم يــُكتب تلقائيـًا و أنت تــُرسل الايميل يكشف عن ايميلك و الآي بي بتاع الجهاز و عنوانك بالتفصيل !

التكنولوجيا غدااااااارة يا معلمي ...

هقولك آه غدارة و ما تعرفش اللي في الناحية التانية مخبي لك ايه !

عادي الواحد خد على قفاه كتير :D 

ماحدش بياكلها بالساهل و الله

الواحد اتمرمط في النت دا XD 

( أنا فاكرة قبل كام شهر ، البوليس جا عندنا الساعة 3 الفجر بأعداد كبيرة و أسلحة و مسدسات و حركات من اللي بشوفها في الأفلام

بس و قبضوا على واحد بدقن كدا و اعتقدنا إنه تبع الإخوان أو تنظيم سياسي بقه و هيسحلوه و ماعدناش هنشوف وشه تاني و كنت

جربت الموقف دا قبل كدا و عرفاه لأن و أنا صغيرة كان عندي جاري الوفدي المعروف بآراءه السياسية الصريحة و مهاجمته للنظام 

السابق و كنت بحب أطلع عنده و أسمع له دايمًا و اختفى فجأة من منزله و قالك مات !!

و لكن أبو دقن دا طلع إنه ممسوك في قضية أفلام مش و لابد بينشرها ع النت و البوليس

عرف موضوع شبكة الأفلام بتاعته دي بالصدفة و فضلوا يتتبعوه لغاية ما وصلوا له و مسكوه !! ... و الله كان بدقن و جلابية

و كل نساءه منقبات !! )

الموهيم يعني إن موضوع التتبع دا بسيط جدًا بس البوليس بتاعنا متخلف ماشاء الله يعني !

نرجع لموضوعنا ،،، 

طب يا عتريسة ... أنا كده فهمت إن الجروبات خاصة اللي مجهولة المصدر خطر و هتجنبها ان شاء الله .. طب بقه بالنسبة للرسايل

اللي بيبعتها أصحابي و بتبقى بنفس الطريقة ؟

و الله أنا يا عتريس يا أخويا بقيت بحذف الرسايل دي ع طول و ما عدتش بدخل عشان أقرأ شتيمتي بوداني ...

يعني هدخل ألاقي كاتب لي (أستحلفك بالله يا مؤمن ) و (انشر و ما تبقاش جاحد) و (ما تخليش الشيطان يلعب في دماغك)

هيلعب في دماغي في رسالة دينية و مش هيلعب في دماغي مثلا اني أدخل على اليوتيوب أشوف حاجات وحشة ؟

حاجة غريبة و الله !!

في بعض الرسائل طبعًـا أنا بستفيد منها بس بتبقى لهجتها لطيفة كدا و أحيانـًا كثيرة بتبقى معروفة المصدر و عادة بيكون موقع

إسلامي محترم و له أصحابه المعروفين !

طب بقه نيجي للرسالة اللي بتغيظني و اللي لقيتها منتشرة بقوة في الدين الاسلامي و المسيحي !

أسماء الفلسطينية اللي حلمت برسول الله أو مريان الفلسطينية (برضو) و اللي حلمت بالقديس مرقس !

قبل ما أبدأ معاكم في شرح الجزء دا ، أحب أقولكم أنا حبيت إعلام ليه ...

السبب ببساطة إني معجبة جدًا بعبقرية (جوبلز) بوق الدعاية لهتلر !

كلنا معترفين طبعًا إن النازية استعمارية و نظام سيء جدًا و صحيح إن هتلر كان بيكره اليهود لكنه كمان كان بيكره العرب و المسلمين

و بيشوفهم ناس ما تستاهلش تعيش و كان يؤمن بتفوق ألمانيا و ألمانيا فقط 

كل دا لازم نوضحه كدا قبل ما أحكي لكم عن إعجابي الشديد بـفكر الأخ النازي -ربنا يجحمه مطرح ما راح بقه- (جوبلز) ...

ازاي الانسان دا عرف يأصل فكرة هتلر المنقذ في نفوس الألمان و نفوس الأوروبيّن ؟

ازاي قدر يلمع هتلر بالطريقة دي ؟

ازاي قدر يعمل حرب نفسية شرسة و يطلع شائعات تهدم النفوس الأوروبية ؟

ازاي قدر يعمل كل الدعاية دي ؟

كلنا طبعًـا عارفين أهمية الإعلام في تلميع صورة الحاكم أو النظام ( و الدليل ماسبيرو ) ... و عارفين الإعلام الأمريكي مثلاً

ازاي إنه بيخلي شخصية تنجح أوي و تنتشر أوي و يلمعها أوي أوي بس لما بيغضب عليها ... بيجيبها الأرض !

(دليل مثلاً مايلي سايروس و بريتني سبيرز في هوليوود و كمان في السياسة زي أوباما و زي بعض الكتاب )

و طبعًا معروف إن اليهود و الصهاينة

هم أقوى ناس في الدعاية على مستوى العالم ... للأسف إعلامنا العربي مش قادر يوصل للدرجة اللي 

يقدر يحارب بيها الإعلام الصهيوني اللي قدر يسيطر على الفكر العالمي ... و طبعًا لازم نعترف إنهم نجحوا في الجزء دا و لازم

نبدأ نطور من أداءنا الإعلامي عشان نواجه الإعلام الصهيوني .

( في فرق بين الصهيونية و اليهودية ...الأولى حركة و الثانية ديانة و لا داعي للخلط ! )

طيب ، ايه اللي بيخلي الشائعة تنجح !؟

الشائعة بتنجح لأنها ذكية بما يكفي للدخول في المكان المطلوب منها تمامًا أن تدخله .

بمعنى ، لو انت جيت قلت لمصري بسيط إن المخلوقات الفضائية هتغزو كوكب الأرض بكرا ... مش هيصدقك و يقول عليك مخبول

لكن لو جيت لأمريكي مهتم أو مولع بالأفلام اللي بتتكلم عن المخلوقات الفضائية و الغزوات الكونية فممكن يصدقك .

لو جيت قلت للمصري إن أنبوبة الغاز هتنقص في السوق هيفزع و يجري يشتري لكن الشائعة دي ممكن ما تفرقش عند واحد تاني 

عنده الأنبوبة متوفرة على طول .

زي في إشاعة سخيفة طلعت من فترة إن محمد صبحي الممثل مسيحي !

و المصيبة إن الشائعة دي انتشرت !!

يعني مفيش حد عاقل فكر إن ازاي محمد . صبحي تبقى اسم مسيحي !!

عشان كدا ، الشائعة ذكية جدًا بما يكفي ، لأن تختار البيئة المناسبة و الوقت المناسب و الأسلوب المناسب للانتشار .

لو جيت تبص للمثال السابق ، هتلاقي إنه المثقفين و الطبقة المتوسطة المثقفة المتعلمة تعليمًا جيدًا هتقولك (ايه الهبل دا؟ هو في حد

مسيحي اسمه محمد صبحي ؟)

لكن ممكن انسان جاهل تمامًا ...فقير...معدم يصدق !!

رغم إنها مش معقولة بس هو سمعها و رددها و نشرها من غير ما يشغل عقله !

و دا طبيعي إن الشائعات تنتشر في كل مكان ... الشائعة لا تختار النخبة و المثقفين عادةً  لأنها عارفة إنها هتتكشف عندهم...

لكنها مش هتتكشف مع الناس البسيطة اللي بتصدق أي حاجة بتسمعها لأنها جائت من مصدر موثوق فيه في ظنها .

و من أكثر الشائعات إنتشارًا في مصر ، الشائعات الطائفية ...شائعات فضائح الممثلين و الممثلات و المغنيّن و المغنيات ...

شائعات الجيران العادية ... شائعات السياسة ...شائعات الدين ...شائعات الاقتصاد ... باختصار كدا مصر فيها كل أنواع الشائعات !

يا فرحتي !!

و دا طبعًا ناتج لأن في حوالي 30% من الشعب المصري أمي القراءة و الكتابة و حوالي 70% من الشعب المصري أمي المعرفة

و التفكير !!

يا كارثتي !!

دا الأمية ما طلعتش أمية قراءة و كتابة بس ...لأ ! دي طلعت أمية تفكير و معرفة أيضــًا !

أبسط مثال لأدلل على ذلك ، الاستفتاء الأخير على التعديلات الدستورية التي تحولت لإعلان دستوري بنصوص جديدة بعد كدا ... 

في ناس كانت مقتنعة إنهم لو قالوا (لا) هيحرفوا القرآن !

كانوا مقتنعين إنهم لو قالوا (لا) المادة التانية هتتلغى (رغم إنها مكنتش مطروحة أصلاً في الاستفتاء) !

طب بذمتكم كدا ... دول قرأوا التعديلات الدستورية ؟!

يعني فهموا هي بتتكلم عن ايه أصلاً ؟!

و لا راحوا كدا من تلقاء نفسهم من غير ما يعرفوا هم بيستفتوا عن ايه ؟!

المشكلة إن المصريين جدعان أوي و بيلبوا نداء الديمقراطية و الجدعنة على طول

بس مش عارفين هم بيتجدعنوا في حاجة صح و لا حاجة غلط .

يعني تلاقي واحد أغمى عليه ... يتلموا حواليه عايزين يساعدوه .. طب حاولوا تبعدوا عنه عشان يتنفس الهوا ... دا التفكير المنطقي

لكن لمتكم حواليه مش هتفيده في حاجة ... و على فكرة حصلت قدامي في كلية صيدلة ...يعني حتى في كلية الصيدلة الطلبة اتلموا

حوالين اللي فقد وعيه لدرجة إني اتخنقت له ...خلاص ابعدوا شوية يا جماعة كدا هيموت خالص !

طيب ،، نشوف بقه كدا الإشاعة التوحفة اللي بتيجي لك ع الايميل كل شوية و تقرفك !

(حلمت فتاة فلسطينية "لو حطوا لها اسم غالبـًا بيبقى أسماء" حلمت بالرسول عليه أفضل الصلاة و السلام و طلبت مني أن أرسل هذه الرسالة لـ30 شخص و سأسمع خبرًا سعيدًا خلال 20 يوم و إذا لم أنشرها فستستمع خبرًا سيئـًا)

نيجي كدا نفصصها حته حته و نشوف ازاي دي ممكن تكون إشاعة قوية جدًا ؟!

و اسمحولي أشرحها على النموذج الإسلامي بما إن صاحبتي المسيحية جابت من آخرها معايا و قالت لي (دا هطل) بالنسبة

للنموذج المسيحي و باين إنه لازم أوعي المسلمين الأول !

أول كلمة كدا يا معلم ، (فتاة) ...

نعم يا عتريسة ؟

انتي هتستعبطي ؟!

مالها فتاة يعني ؟

هقولك مالها و نص يا عتريس يا أهبل !! ...

اللي بينشر الإشاعة دي عارف إنها هتروح لمين ... ؟؟؟

هتروح لعربي ... مسلم ...مسيحي ..المهم إنه عربي !

و زي ما احنا عارفين ... فالعرب بيعاملوا المرأة كشيء مقدس (دا المفروض يعني) ... ازاي ؟

يعني المرأة عند العرب شيء خاص و حساس جدًا ... و العربي بيحس إنه راجل لما بيحمي امرأة !

فتلاقي دايمًا الراجل العربي مهتم بأمه و بزوجته (دا المفروض برضو) و ببناته و بأخته و بعمته و بخالته و بنات عمته و بنات

خالته ووو...إلخ و دايمًا بيخاف عليهن و يحاول يحافظ عليهن.

و عشان كدا فـأي رسالة تحتوي على (فتاة) أكيد هتخلي عرق الشهامة ينفض عند الراجل العربي و يكمل قراءة الرسالة أفضل

من لو كانت (فتى) ... يعني ببساطة كدا ... البنت تكسب أكتر في الدعاية و الإشاعة !

و حتى لو حطوا اسم و هو غالبـًا اسم على غرار (أسماء) أو (مريان) فهو اسم منتشر و هتلاقي مليون واحدة بنفس الاسم دا

و طبعًا مفيش صور و لا فيديو للبنت دي ... مجرد رسالة بريد إلكتروني !!

نيجي للكلمة التانية ... فلسطينية !

طب اسمحولي كدا أقفز للكلمة اللي بعدها (حلمت برسول الله) ... طب نفسي أفهم ...

هو مفيش بنت مصرية أو تونسية أو سعودية ممكن تحلم بالرسول عليه أفضل الصلاة و السلام ؟؟

اشمعنى فلسطينية يعني ؟

ماهو برضو كل الدول العربية بتمر بضيقة ... هتقولي احتلال ؟

طب هقولك اشمعنى العراق ؟ اشمعنى ماكنتش بنت عراقية ؟!

آآآآآه... نيجي هنا بقه للنقطة اللي بتحسس كل عربي و عربية بالقهر و بالدم بيغلي في العروق و الهتاف من الحنجرة يدوي

(نموت نموت و تحيا فلسطين) 

فــلـــســـطــــيــــــن !!!

يعني ممكن كاحتمالية يبقى في عربي أو عربية واحدة بتحب أمريكا أو مش متعاطفة أوي مع العراق لكن مستحيل مستحيل مستحيل

تلاقيه بيحب اسرائيل (يع! مش لايقة الكلمة حتى) أو مش متعاطف مع القضية الفلسطينية .

يعني بالعربي كدا ...اسرائيل واخدة جايزة الدولة المكروهة من قبل العرب

(هي عصابة في الحقيقة بس هنمشيها عشان السياق الدرامي)

و دايمًا فلسطين بتفكرنا بالوكسة و النكسة و الهباب الأسود اللي حط علينا  إننا مش عارفين نحررها !

يعني فلسطين بتخلي دم أي حد يفور ... أي حد مسلم أو مسيحي ! 

يعني الكلمة الثانية في الإشاعة تدعوك لمزيد من القراءة و التوغل ...

طيب ، نيجي لـطلب الإرسال و عادة بيكون يا إما لكل اللي عندك يا إما لكل اللي عندك ... و حتى أحيانًا لما بيكون الايميل جديد

و مش مكمل العشر أشخاص بحتار أبعت لمين عشان أكمل التلاتين واحد المطلوبين (دا لو كان محدد بالعدد) ...

طب ليه ؟!

ليه لازم أمرر الرسالة ؟!

يعني ايه الغرض الرهيب الفظيع اللي هيعود عليّ لما قريت الرسالة دي و هرجع أبعتها تاني ؟!

و خاصة إن الرسالة ما بيبقاش فيها حاجة غالبًا ... مجرد السطور الماضية فقط ... أو الشهادة أو تسبيح أو حمد ...

يعني أي مسلم صح بيصلي ... هينطق كل يوم خمس مرات الشهادة و الحمد و ممكن يقول تسبيح ...

يعني الفكرة إنه مش ناسي دينه ... و إلا لو ناسي دينه يبقى مش هيبص على الرسالة دي أصلا أو هيبص و مش هيبعتها !

طب نيجي لـمدة العشرين يوم ... ليه عشرين يوم ؟!

طب ليه يحدد ميعاد أصلاً ؟

ربنا وحده هو من يعلم الغيب ... يعني مفيش ايميل و لا عرّاف يقدر  يعرف الغيب !

طب ليه بتقولي اني هسمع خبر حلو و لا هسمع خبر وحش في خلال 20 يوم ؟

20 يوم وقت طويل بالنسبة للعرب ...هينسوا لأنهم على طول بينسوا ...و عشان كدا مش هتفرق معاهم لو سمعوا خبر وحش أو حلو

و أنا جربت الحكاية دي قبل كدا زي ما قلت لكم ...مرة بعتّ و مرة لأ و كنت بحسب الأيام و مفيش حاجة حصلت !!

طب بتقولي ليه اني هدخل الجنة لو بعتها و هدخل النار لو ما بعتهاش؟

هو انت ضامن تدخل الجنة ؟

حد ضامن ؟

دا حتى الصحابة كانوا بيعملوا لآخرتهم كل يوم كأنهم مش ضامنين يدخلوا الجنة و لا لأ !

يعني مش الايميل اللي هيدخلني الجنة أو هيدخلني النار !

يعني ربنا الوحيد اللي عارف أنا مصيري ايه خلال الـ20 يوم ...!!

يعني مفيش حد يقدر يقول ايه اللي هيحصل بعد ساعة ...!!

أنا نفسي ما أضمنش إن النت ما يقطعش دلوقتي و معرفش أبعت المقالة دي !!

معرفش هقدر أخلص المقالة دي و لا هيحصل لي حاجة قبلها !!

طب بتحكم عليّ ليه بالجنة و النار من رسالة ؟

أو بتحكم إن الشيطان لاعب في دماغي أو إن ذنوبي منعاني أبعت الرسالة ؟؟!!

مش ممكن أكون داخلة مستعجلة و مش هقدر أبعت حاجة ؟!

مش ممكن يكون ورايا صلاة و عايزة أشيك بسرعة على الايميل و الفيس بوك قبل ما أروح أصلي ؟!

مش ممكن يكون ورايا حد مستنيني عشان أقضي له مصلحة تفيده ؟!

مش ممكن أكون داخل عشان أتبرع لمستشفى ؟!

انت ليه بتحصرني في الايميل دا ؟!

ليه مش بتفكر قبل ما تبعته إنك ممكن تفيد نفسك و تفيد بلدك و دينك بحاجة تانية غير كبسة زر الإرسال دي ؟!

مش حاسس إنك لازم تقوم تذاكر عشان تنجح ؟!

مش حاسس إنك لازم تطور من مهاراتك عشان تبقى شخص أفضل ؟!

مش حاسس إنك ممكن تروح تزور ملجأ أيتام و تكسب ثواب أكتر ؟!

مش حاسس إنك لو روحت قريت سطر في القرآن دا هيفيدك أكتر ؟!

ما تقوليش بحاول أفيد اللي حواليَّ ... كل واحد حر في دينه ... كل واحد قادر على اختيار ما يستطيع فعله و ما يستطيع تقديمه

لأجل دينه و وطنه ... ما تحكمش على حد ... ما تفرضش رأيك على حد ... ما تقولش لحد ذنوبك منعاك لأن ممكن هو يبقى أتقى

منك !!
و اعلم يا بني آدم إن ربنا هو اللي بيحاسب ... وهو سبحانه و تعالى اللي قادر يدخلك الجنة أو يرميك في النار !

و قبل ما تنقل ... اسمع و فكر و حاول تناقش بالحسنى ... هتلاقي نفسك ارتحت كتير و هتلاقي وقتك أصبح أكثر 

و هتلاقي نفسك بتساعد برضو بس بطريقة تانية غير الايميل !!

معلش أنا طولت عليكم في الكلام ، بس الموضوع دا غايظني أوي و حاسة بعد كل الكلام دا إني لسه ما خلصتش كل اللي عندي

الفكرة إني حسيت إننا بنضيع وقت طويل أوي و احنا بنبعت الرسايل دي رغم إننا كنا ممكن نستفيد بوقتنا دا في حاجات مفيدة

تانية و هناخد عليها ثواب كبير برضو و إنك مش محتاج صورة تفاحة عليها اسم الله لتؤكد وجوده لغيرك ...

ربنا موجود في كل مكان حوالينا ... بص لنفسك انت معجزة و بص لايدك و بص للسما و بص للورد و بص للنجوم

و بص لحاجات كتيرة أوي ...نعم لا تحصى و كلها تؤكد وجود الخالق عز وجل و لو عايز تثبت للغرب حبك لربنا و إن

الإسلام دا دين رائع فبالعلم و العمل هتخليه يعترف مش بالايميلات و الجروبات على الفيس بوك !


و يلا بقه أشوفكم بكرا ان شاء الله عشان أنا تقلت عليكم أوي :)











هناك 12 تعليقًا:

  1. حلو جدا جدا جدا
    بس طويل جدا جدا جدا
    واضطريت اني اقراه كله
    وعجبني والله
    وفعلا للاسف فيه ناس بتطلع اشاعات زكية جدا
    وف اوقات مناسبة
    ربنا يحمي بلدنا وشباب بلدنا

    ردحذف
  2. موضوع رااااائع يا سووو , و هو طويل بس محستش بطوله و الله
    قريته كله و أنا مستمتعة بيه ..
    بالنسبة لموضوع الرسائل ده .. معاكى حق يا بنتى و الله !!
    أنا كنت وصلت أنى بقيت ألغى الرسائل دى فعلا ..
    بس منتشرة على الفيس بوك بطريقة بشعة . حتى ناس كتير من أصحابى بيحطوها عندهم
    و أنا مش عارفة هل ده عن اقتناع و لا ايه !!
    بالنسبة لموضوع الاشاعات ..
    ما شاء الله احنا أحسن شعب يطلع اشاعات و يصدقها
    و أكيد ده بسبب مستوى الثقافة و التفكير المتدنى للأسف !!
    و فى ناس كتير جدا بتستغل ده لصالحها أنها توهم الناس بحاجات وهمية
    زى بالظبط اللى حصل وقت التعديلات الدستورية !!

    ردحذف
  3. ههههههههههههههههههه وربنا انتي تحفة
    شديتيني لآخر حرف...تنفعي صحفية على فكرة
    بس نقدي الوحيد انك بتستطرقي لموضوعات كتير اوووووووووي بعيد عن الموضوع الرئيسي..ده كويس احياينا بس انتي بتطولي اوي وبتتناولي الموضوعات الفرعية بالتفصيل..كده الناس هتزهق منك :D
    شطورة يا سارورررة

    ردحذف
  4. نسيت اقولك صحيح
    شيلي الكلمات التأكيدية م التعليقات
    وانا هشير البوست
    :D :D
    سلامات

    ردحذف
  5. الرسايل دي بتكون مستفزة جدا
    مقال جميل قريته لآخره حتي لا تحل علي لعنة الفراعنة

    ردحذف
  6. EL pRiNcEssA @ معلش لأن المقالة طويلة ^^" عشان بس هي مهمة و لازم نشرحها بالتفصيل للناس :)
    و الإشاعة فن ذكي جدًا مش أي كلام !!
    آمين و أجمعين يا رب

    ----------------------------
    Radwa Ashraf @ رافعة من روحي المعدنية على طول كدا :D
    فعلاً فعلاً أنا بقيت بلغيها و وصلت لدرجة إني بقيت بشم ريحة الرسالة من عنوانها و أعرف إنها تحتوي على مثل هذه الأمور !
    هههههههه
    مشكلة الشعب عندنا إن أغلبه أعطى لمخه أجازة و بينقلوا الكلام من غير ما يكونوا متأكدين منه...بس لمجرد الكلام و التعميم !


    ----------------------------
    طالبة مقهورة ..درجة أولى @ أشكرك يا جميلة :D
    ههههههههه
    الفكرة إني مش عاملة مقالة ...بتكلم عادي يعني كأني بتكلم مع واحدة صاحبتي فعادي بستطرق ___-___
    و ان شاء الله أحاول أقلل من العملية دي في المستقبل :)
    أشكرك و هشوف موضوع الكلمات التأكيدية دي لأني بخاف من السبام و الردود العشوائية و كدا...
    سلام :)

    ----------------------------
    غير معرف @
    ههههههههههه
    أيوا كدا كويس :D
    عشان بلاش تحل عليك اللعنة نياهاها

    أشكركم جميعًا على المرور و التعليقات الحلوة أوي دي
    ما تحرمونيش من زيارتكم
    و معلش استحملوا كلامي الكتير ^^" دي آفة صاحبتكم
    نورتوني ^-^

    ردحذف
  7. الحزن دوله لايعيش فيها سوى الدموع @ أشكرك :)
    نورت المكان
    ما تحرمنيش من زيارتك ع طول ^^

    ردحذف
  8. يوست طويل اوي يا سارة
    بس جميل فعلا

    بصي اقرأي مقال د.أحمد خالد توفيق في الموضوع ده
    المقال اسمه ثقافة الفور ورد

    مقال حلو اوي و هيوضح لك حاجات كتير

    http://www.algam3a.com/bb/index.php?showtopic=29099&mode=linearplus

    ردحذف
  9. @سكندري

    فعلاً هو طويل لكن مليان معلومات بحيث تخرج منه عندك فكرة عن حاجات كتير :)

    شكرًا ليك

    و قريت المقالة و فعلاً فعلاً الموضوع دا يضايق أوي !

    ربنا يهديهم و يهدينا :)

    أشكرك ع الرد الحلو دا

    ابقى نورني ع طول :)

    ردحذف
  10. سارة رائع كالعادة :) :)
    و احب انوه انى انا البنت المسيحية اللى بتحبهاجدا :) :)
    بجد عجبنى جدا و فعلا نقابل الهجص ده كل يوم :) :)

    ردحذف
  11. المقال حلو جدا جدا
    عجبنى من أول حرف .. للنهاية
    الموضوع فعلا يستحق النقاش وان ناس كتير لازم تأخد بالها
    بتضايقنى الشخصيات دى واتمنى يشوفوا المقال ده :))
    أبدعتِ ^_^

    ردحذف