الأربعاء، 24 أغسطس، 2011

رأيي في بعض الدعاة الشباب !

يا عزيزي القاريء يجب أن تعرف قبل أن تقرأ أن هذا رأيي الشخصي و لست مطالبًا بأن تعتنقه و تتبناه و لكن أن تتقبل وجوده

في الحياة حتى و لو كان هناك شخصًا واحدًا يعتنقه و هو أنا . و طبعًا من حقك تعترض أو ترفض هذا المبدأ لكن ابتعد عن التجريح

الشخصي لشخص الكاتب و إلا ستسمع ما لا يرضيك !

و ثانيًا يجب أن تعرف أيضًَا قبل أن تقرأ أن صاحبة المقالة اللي هي العبدة الفقيرة لله أنا من النوع المهتم جدًا بالتخصص و أهميته في

الحياة . فلو لقتني مش مرنة معاك في جزئية المهنية و نتغاضى عن دا و عشان خاطري و النبي والكلام دا كله ...فاعرف إني

أولاً مرنة بس في قناعاتي لا أقبل التزحزح عنها و لو بمللي واحد ثانيًا مش بحب شغل و النبي و عشان خاطري دا :D ثالثًا

أنا بحب الدقة العلمية و المهنية جدًا .

دلوقتي نبدأ بقه :)

في ناس كتير بتسألني ليه مش بتحبي فلان ؟ أو بتسمعي لعلان؟

دا داعية ممتاز ... دا بيقول كلام حلو ...دا خلاني أبطل أعمل كذا..دا كذا...

و حقيقةَ إني كنت زمان من محبي سماع عمرو خالد و ما أنكرش إنه أثّر فيّ في وقت من الأوقات

لكن مع الوقت خلاص فقد بريقه بالنسبة لي و بدأت نظرتي تتغير و ربما

تنضج بالنسبة للدين و لبقية الدعاة ...

و بدأت أفكر أكتر و مزاجي يتجه ناحية العقل أكتر من العاطفة أو الكاريزما .

و الدعاة خاصة الشباب بيعتمدوا أكثر على الكاريزما و طغيان الشخصية فتميل شخصيتك ناحية هذا الشخص من خلال

العاطفة و ليس من خلال ما يقوله هو .

و الموضوع دا مش عيب لكن لو كان حكمك بس على الشخص من كاريزمته فـدا العيب !

و يستغل البعض هذه الكاريزما الآن في بث أفكار معينة تخليك تتجه إتجاه معين ناحية شيء ما .

زي ما سمعت في أحد البرامج لواحد من الدعاة المشهورين إن الدولة الإسلامية كانت دولة قوية استمرت قرابة الخمس قرون

و مكنتش بس 40 سنة !

و لأني مش بحكم على حد ...فأتوقع إن الداعي دا كان حسن النية بس فكرته وصلت غلط و يبدو أنه لم يقرأ كثيرًا عن التاريخ

السياسي الإسلامي أو المشاكل و الحروب التي قامت من أجل كرسي الخلافة الإسلامية  . و زي ما قلت أكيد كانت نيته حسنة

بس هو خلط خلطة عجيبة ما بين الدين و السياسة فطلعت ماسخة غير مستساغة منه !

على الأقل بالنسبة لي !


أيضًا ، الشباب الدعاة الكثير منهم مش خريجي أزهر ...يعني تجارة و حقوق و جامعة أمريكية و يمكن دكتور !

  طب و دا إزاي يفتيني في ديني ؟

في ناس هتطلع و تقولي الفتي حاجة و تبسيط الدين حاجة ..ماشي موافقة ..بس فين الـCertificate بتاعتهم ؟

فين الشهادة اللي الأزهر أو جهة قانونية ما طلعتها لفلان دا عشان يبدأ يتكلم في الدين ؟

هتقولي طب ما الشارع كله بيفتي في الدين !

هقولك الشارع حاجة و التلفزيون حاجة !

زي ما انت بتقول لبتاع الميكروباص (بس يا حمار) ما تقدرش تطلع في برنامج تلفزيوني تقولهاله !

طريقة الشارع تختلف عن طريقة التلفاز ... في الإعداد و التقديم و الطريقة و كل حاجة !

و بعدين أصلاً كلنا عارفين إن الفتي غلط خاصة لو في الدين !

يعني افتي في كل حاجة و اتكلم في كل حاجة ...بس تعالا في الدين واعمل Pause و فكر كويس قبل ما تتكلم !!

ناس هتقولي طب يا سارة ماهو كدا مش هناخد نصيحة من بابا و ماما !؟

هقولهم لأ...بابا و ماما لما بينصحوا بيكونوا دامجين نصيحتهم بخبرتهم في الحياة و بيديك الخلاصة بتاعته !

بابا و ماما بيكونوا كبروا ونضجوا خلاص ويقدروا يسمعوا للشيوخ و الأزهريين و يفهموا ويعقلوا و ينفذوا صح 

مش بس يرددوا كلام من غير ما يفهموه بسبب تأثرهم بالشخصية الكاريزمية اللي قدامهم !

هتقولولي بس في بعض الأمهات بتسمع فعلاً للدعاة الشباب...

هقولكم أيوا عادي ... بتسمع عشان تعرف هل بيقولوا حاجة صح و لا غلط و بيعلموا الشباب إزاي ..طب هل الطريقة اللي بيقولوا

فيها الكلام دا بيأثر في الشباب ولا إيه ؟

مش لازم الأب أو الأم لما يتفرج على الدعاة الشباب يبقى مقتنع بيهم ... هو بس بيشوف هو بيتكلم إزاي و عن إيه و كدا

كمان عندنا في مصر و عمومًا ...فكرة قبول النصيحة من الأصغر سنًا غير مستساغة ...

يعني انت نفسك مش هتقبل نصيحة من طفل في ابتدائي أو هتتقبلها بتقل دم !

طب إزاي الأب أو الأم هيكتفوا بمشاهدة الداعية الشاب دون الاهتمام بالاستماع إلى الدعاة الأفاضل و الشيوخ الأزهريين

ذو الخبرة و المكانة ؟!

في ناس هتيجي تقولي ..طب ماهو لو الأزهر مش موجود...

هقولهم لأ ! سؤالكم مرفوض !

مادام الأزهر موجود يبقى كله يلتزم !

لما يبقى -لا قدر الله- يتهد نبقى ندور على حلول تانية !

مش كل واحد حفظ له كام سورة و كام حديث هيطلع علينا داعية و مصلح !

في شيوخ بتبسط الدين برضو و كمان في شباب أزهريين بيتخرجوا و نفسهم يلاقوا نفس الشغل اللي بيلاقوه غير المتخصصين

اللي اتخرج من تجارة يشتغل في شغلته و اللي اتخرج من طب يشتغل في شغلته لكن ما يفتيش في الدين !

عايز يشتغل داعية  ...يروح الأزهر و يقولهم (يا أزهر أنا عايز أشتغل داعية، أعمل ايه؟)

المفروض الأزهر ساعتها يفعل دوره التنويري و يبدأ يقوله (يا بني المفروض مثلا تدرس كذا) أو (تعمل كذا) أو (تتخطى امتحان كذا)

و غيرها من الفروض المفترض إنها موجودة !

مينفعش أجيب مهندس و أقوله إنقذ حياة مريض من الموت !

طب هو مهندس ، هيشتغل شغلة الطبيب إزاي ؟!

ممكن المهندس يفهم يعني ايه سكرى و يعني ايه ضغط دم و يعني ايه غرغرينا ... لكن عمره ما يقدر يقولك علاجه الشيء الفلاني !

برضو أهل الدين كدا !

و بنلاقي تفسيرات مغلوطة كتير اليومين دول لأحاديث شريفة و تأويل غريب فيها

طب ليه كل دا ؟!

عشان في دعاة كتير بيستغلوا الدين في إرضاء طموحاتهم و أهوائهم الشخصية و توجهاتهم ...

عشان في دعاة كتير مش دارسين كويس و دا ناتج عن قلة ثقافة أو تعليم أو عدم تخصص ! 

و عشان قدام كل واحد من الدعاة الشباب الكويس بيطلع قدامه عشرة وحشين بيشتغلوا في قنوات دينية و يلعبوا في راس الشباب

بخت !

و لا ننسى بعض الفتيات التي تحولن لـ(ألتراس فلان الفلاني) و كلامهم عن إنه (مز) و (ماحصلش) و الأفلام دي كلها و اللي

تعتبر خارجة عن إطار الدين و ما يحاول الدعوة إليه هؤلاء الدعاة بل و يتطاول بعضهن و يبدأن في سب من يعارضهن و كأنه


آلهة أو نبي و نسين إنه بشر يخطيء و يصيب !

كل واحد و تخصصه و اللي أجبره الزمن أو طموحاته أو أحلامه أو مواهبه على الاتجاه إلى تخصص آخر يبقى لازم ياخد مشورة

من حد ...مينفعش بكرا واحد يقول هشتغل نجار و ما يروحش لواحد يعلمه الصنعة الأول !

عزيزي و عزيزتي القارئة ... احنا مضحوك علينا بحاجات كتير و اكتشفنا بعضها في الأشهر و الأيام الأخيرة ، ما تفتكرش إن الدين بعيد عن معترك اللعب في الدماغ و دغدغة العقول و القلوب!



أكيد في حد دلوقتي هيجي يتهمني بإني بقول رأي و خلاص و إني مش متخصصة في المجال دا و مش المفروض أتكلم و وو

و ردي بسيط جدًا :)

أولاً ، أنا مش بفتي و بقول رأيي و قلت لك في الأول دا رأيي و حتى لو كان رأي واحد من مليارات عايشة على كوكب الأرض

ثانيًا ، أنا أعتبر نفسي قارئة جيدة و بفهم شوية و لازم أبقى على اطلاع بكل حاجة .

ثالثًا ، أنا أطمح أن أكون إعلامية و أنا حاليًا مدونة فبالنسبة لي لازم أكون عارفة أي حاجة عن كل حاجة حتى لو سطحية ! 

و لازم يبقى لي رأي في كل حاجة حتى لو مش عاجب حد أو ناقص ! فالناقص يكتمل بمرور الوقت و بالتعلم أكتر و أنا لا أدّعي

إني أفضل قارئة في العالم أو صاحبة الرأي الأفضل ...أنا مجرد إنسانة ممكن أكون نكرة لناس كتيرة بس لي رأي و لازم يحترم !


في النهاية ، أحب أشكركم لأنكم خصصتم وقت لقراءة رأيي حتى و لو كان مخالفًا لكل ما ترونه و هو رأي يعتمد على عقلي و علمي البسيط و البحت و لا أدّعي إنني أفقه في أمور الدين مالايفقهه غيري أو أدّعي شرف ليس لي .


 ففي النهاية
الاختلاف في الرأي لا يفسد للود قضية ،و لا أعتقد أن أحدًا من الحاضرين هنا يعتقد أن هؤلاء الدعاة مبجلين و معصومين من الخطأ أو الانتقاد !

صح و لا إيه يا شباب ؟ :)








هناك 6 تعليقات:

  1. اهدى يا ساره ..متخفيش من كلامك لانك ببساطه عندك حق

    هو فى حد ابنه يعيا يوديه للسمكرى ...لا بيروح بيه على دكتور ...اهى دى زى دى يعنى انا اساوى اللى طول عمره فى الازهر من الابتدائى و حافظ قران و سنه و فقه و شريعه مش كتسيله لا كدراسه جاد بحد درس ثانوى عام و منها عالحقوق و بعدين قرا الفرار الى الله و قرا له كتبين كمان على حفظ كام جزء لا و اعتبره احسن من الازهرى كمان!!

    ثم ان الدعاه الجدد فيهم مشكله معايا اضافه : هاقولهاك و مش هتكسف بس بصراحه معظمهم وسيم زياده عن اللزوم...ينفعوا ممثلين لكن مفيش وقار الشيخ

    هذا و الله اعلم ..و ده انطباع شخصى عن نفسى

    ردحذف
  2. انا مش متفق معاكى يا سارة فى كتير فى اللى قولتيه

    اولا حاجه كويسه جدا جدا ان احنا عندنا جيل جديد من الدعاه بأساليب مختلفه وتنوعه وبيجتهدو فى الدعوة بأساليب متباينه عشان فى الآخر الهدف يوصل للناس وهو ماهيه الحياه فى كنف الاسلام

    معاكى ان علمهم مش كبير
    ممكن يكون بعضهم مش معاه شهادات أزهريه ولو ان دا مش مطلوب اطلاقا
    ممكن بعضهم يكون له آراء شخصيه خاطئه فى بعض الاحيان
    لكن دا لا ينفى مجهودهم وانهم فعلا عملو طفرة فى مجال الدعوة

    الازهر هيئه صووووريه لا حول لها ولا قوة

    القنوات الدينيه مليانه بشيوخ عتاوله نادر منهم اللى درس فى الازهر
    ومع ذلك كلنا بنسمعلهم وبناخد بآرائهم وفتاويهم

    ممكن يكون فى داعيه بدايته كانت كويسه اعلاميا وبعد كدا نورة انطفى لكن اللى انا واثق منه انه كل ما بيخطو خطوة فى طريق الدعوة علمه بيزيد

    المفروض انى وانا بتفرج على اى داعيه ايا كان اخد كلامه بعقلانيه .. لو فى حاجه انا شاكك فيها او حاسس انها مش منطقيه ارجع للكتب ارجع للسنه ادور وابحث عشان اتاكد .. مافيش شيخ بيقول قرآن كل الكلام دا يحتمل الصواب والخطأ

    مايبقاش قلبك اسود كدا من ناحيه الناس دى

    انا اتمنى انى اكون مكانهم واقدر اوصل واحد من ميه من اللى اعرفه وانا طول عمرى فى الازهر

    في بقى حاجه كمان ... اذا كان داعيه علمه قليل وطلع على الناس فدا مش عيب منه .. دا عيب من اللى ادله الفرصه على قله علم
    واحنا قنواتنا مفتوحه لاى حد عنده كاريزما مش شرط علم


    طولت عليكي معلش

    ردحذف
  3. ازيك يا سارة
    في البداية أحب أكد علي كلامك في اخر البوست
    اختلاف الرأي لا يفسد للود قضية

    و احب اقولك انا مختلف معاكي في كثير من اللي قلتيه في البوست

    اولا موضوع التخصص ده مهم جدا ، اوكيه أنا معاكي
    بس مش ممكن دكتور دارس طب و معاه ماجستير و مش شاطر في شغله العملي

    و مش ممكن مهندس ما كنش متوفق في الكلية كويس بس لما دخل مجال العمل اثبت نفسه

    الكلام اللي عايز اقوله ان ممكن يكون واحد في الازهر و حافظ قراءن و قارئ جيد في السنة بس مش قادر يوصل للناس ، و ان ممكن واحد علمه قليل اه بس قادر يوصل للناس
    او واحد خريج كلية و هو متفوق في حاجة تانية

    يعني مثلا الشيخ "محمد حسان" داعية كبير و شيخ جليل مع ان شاهدنه الجامعية الأولي هي بكالوريوس إعلام
    و بعدين كمل في الأزهر

    انا قلت المثال ده علشان بس اقول ان مش معني اني خريج كلية اعلام اني ابقي مذيع و لا هندسة اني اكمل حياتي مهندس

    مش ممكن مهاراتي و قدراتي تنفع لحاجة تانية احسن ؟

    نيجي بقي لنقطة مهمة تانية في موضوع التخصص اللي انتي بتقولي عليه

    العلوم البحتة حاجة و العلوم الانسانية حاجة تانية
    بمعني في واحد كويس جد علميا و كل حاجة بيحبها بالورقة و القلم ده يدخل علوم و لا طب و لا هندسة اكيد هيتوفق
    انما في الدين مثلا لازم يكون له قدرة علي التواضل مع الناس يحس بمشاكلهم و يعرف ازاي يوصل لهم الدين بصورة يفهموها و يحببه في الدين ما يكروهوش

    يعني مش لازم يكون خريجي ازهر علشان يتكلم في الدين
    بس لازم يكون واخد العلم من شيخ علي علم علشان ما يقولش حاجة غلط
    و كما قيل "لا ياخذ العلم من مكتبي و لا القراءن من مصحفي"

    بمعني مش معني ان واحد قرأ كام كتاب انه بقي عالم
    و اعتقد ان قلة علم الواحد من الدعاة ده ما يوقفمش انهم يدعو الناس
    يعني اي واحد علمه اكثر مني انا هقعد و اسمع منه حتي لو كان اصغر مني سنا

    و اعتقد ان ابائنا و امهاتنا بيقعدوا يسمعوا للدعاة مش علشان بس يشوفوا ايه الصح و ايه الغلط
    لا ده كمان علشان بيستفادوا

    علي فكرة في الاخر احب اقولك فعلا انه اكره الشخصنة
    بمعني ان فعلا بعض الناس بتحب عمرو خالد لانه عمرو خالد !! بس ده طبعاً مرفوض

    اطلت في الحديث ، ارجو ان اكون قد نقلت وجه نظري

    و كل سنة و انتي طيبة

    ردحذف
  4. عزيزي و عزيزتي القارئة ... احنا مضحوك علينا بحاجات كتير و اكتشفنا بعضها في الأشهر و الأيام الأخيرة ، ما تفتكرش إن الدين بعيد عن معترك اللعب في الدماغ و دغدغة العقول و القلوب!
    تسلمى يا سارة

    ردحذف
  5. فيه كتير من كلامك صح بس عندي اعتراض على بعض الحاجات :
    1- الأزهر دوره غير فعال .. المفروض هو من نفسه لما يشوف دعاة شباب بيطلعوا ياخدهم يثقفهم و يدربهم لان دوره و للأسف لا يؤديه .
    2- التخصص مهم جدا بس شباب الأزهر اللي مش لاقيين شغل هما مدوروش على شغل و لا تعبوا و لا اجتهدوا قد ما الدعاة الشباب اجتهدوا عشان كده نجحوا .. كتير من خريجي الأزهر بيروح يدور على شغل تاني يشتغله لان الدعوة مبتأكلش عيش .
    3- كتير من برامج الدعاة الشباب مش برامج دينية بحتة معظمها مرتبط بالتنمية البشرية و التربية النفسية . برنامج زي عمار الارض بتاع مصطفى حسني برنامج متعوب فيه و معمول فيه شغل و هو بينقسم لجزء فيه شريعة و جزء فيه تنمية بشرية و جزء فيه علم نفس وزي ما قلتي التخصص موجود في البرنامج و كل واحد بيشتغل عاللي بيفهم فيه . وكمان فيه واحد زي د.عمرو خالد ده دارس و فاهم الدين كويس أوي بدليل الدكتوراه اللي أخدها دي مخدهاش في الكيمياء يعني !
    4- كتير من الدعاة الشباب دخلوا كلياتهم و هما مبيحبوهاش و لا مقتنعين بيها كحال أغلب شباب مصر .. ايه المانع لما يجرب يشتغل في حاجة هادفة ؟
    5- أنا كمتفرجة على برامج الدعاة الشباب أحب أقولك اني بتفرج عليهم و بعقل كلامهم و بيعجبني لاني ببساطة ملقتش البديل اللي يوصل المعلومة الدينية الشرعية بطريقة سليمة .. علماء الازهر مبيقوموش بدورهم كما ينبغي و شيوخ السلفيين أسلوبهم منفر و متعصب و بيكرهوني في عيشتي و مبحبش اتفرج عليهم .. غير كده مقداميش غير مسلسلات تركي و أفلام هابطة و قنوات أغاني و ستار اكاديمي .. يبقى ايه الأحسن بقى يا سارة .

    ردحذف