يوليو خلص ؟! كل سنة و انتو طـــيــــبـــيـــــن !!

نعم نعم ؟!

بتقولوا أنا كاتبة ليه العنوان دا ؟!

آه ...أصلكم مساكين ما تعرفوش !!

الشهر دا من أسوأ الشهور عندي في السنة !!

روحوا كدا اتأكدوا انه خلص ...

خلص بجد ؟!

بجد بجد يعني و لا هزار ؟! 

ماشي ماشي ... كويس كدا

نبدأ نتكلم بقه براحتنا ^.^

الشهر دا حظه وحش معايا يا ناس ...

من سنتين كدا بدأ النحس فيه

رجعت يوم تعبانة و مفرفرة من تدريب السباحة 

مالك يا بنتي ؟

مش قادرة ...دايخة و حالتي حالة ...

روحنا ع الدكتور

و أخدت لي آخر أسبوعين في يوليو في السرير

مش باكل و لا بشرب اللهم  إلا  تفاح و بعد جهد جهيد مع الدكتور اقتنع بالشاي و البقسماط !

حقنة كل 12 ساعة ... و دايخة و مش قادرة أقف و لا حتى أشوف الكمبيوتر أو التليفزيون 

و أيامها أعدت أألف -في دماغي طبعًا - قصة خيال علمي سخيفة كدا بس لما خلصت مرض ...

اكتشفت انها مأساوية أكتر م اللازم و ما تنفعش 

و أيامها دخلت على رمضان و أنا بمعدة فاضية تقريبًا ... عشان كدا من يوم 10 رمضان كنت بقول (جاااااااااي)

السنة اللي فاتت ... برضو نفس المرض بس أخف شوية ... قبل رمضان برضو و في آخر أسبوع من يوليو ...

و كان أي حد بيكلمني في التليفون بيسمع بس (كو...سا...و...اتي...يبة)

الترجمة = كل سنة و انتي طيبة

و عشان كدا ،، ارتبط معايا شهر يوليو بالأمراض و السرير و النوم ...

و من يوم 1 يوليو 2011 .. بدأت الاستعدادات القصوى لمواجهة المرض ...

آيس كريم ؟! ... لأ ... زوري !

أكل من الشارع ؟! ... في الحالات القصوى فقط !

ميدان التحرير ؟! ... نص ساعة ...ساعة بالكتير أوي !

ميدان المحافظة ؟! ... آآآتششووو ! يلا بينا نمشي !

الكوفرتة عامل أساسي في عملية النوم ؟! ... آه طبعًا ما أستغناش !

التكييف ؟! ... اظبطه ع تايمر و بلاش تبرده أوي !

ماية ساقعة ؟!... صبرني يا رب ! زوري يا ناس !

بيجامة صيفي ؟! ...بنطلون طويل و قميص ...مش ناقصين !

لبس خروج صيفي ؟! ... لازم بـكُم و بنطلون بيدفي !

شعرك ؟! ...مش هروح للكوافير قبل ما الشهر يخلص !!

و في أول يوليو كدا تعبت شوية و جالي مغص رهيب و قلت : خلااااص... النهاية يا سوسو !

بس الحمدلله خفيت بعدها بيومين كدا بس بعد ما نمت في الحر و برضو اتغطيت بالكوفرتة و لبست بنطلون بيدفي  !

و عشان كدا ... يوليو يرتبط معايا بأسوأ الأيام !

يا رب نتيجتي ما تتأثرش السنتين الجايين بالشهر دا ! 

يوم لما صاحبتي (أكبر واحدة في شلتنا) اتجوزت و بعتت رسالة إنها خلفت يوم 2 يوليو ...

قلت الحمدلله ! النحس هيتفك شوية بقه

و هيبقى في مناسبة سعيدة في يوليو !

و آدي يوليو عدى و راح و فات ...و جا أغسطس بحره بعرقه بتلزيقه ببابا غنوجه ...و جا معاه الشهر الفضيل !!

فكل سنة و انتو طيبين

و أتمنى يعجبكم الاستايل بتاع المدونة =)

هو آه صحيح الصورة كاملة مش من تصميمي ...بس أنا أخدتها و أضفت لها شوية حبشتكنات كدا و خليتها (بروبروء)

و استنوني كل يوم ان شاء الله في حملة التدوين اليومي لشهر أغسطس و صاحبة هذه الحملة .. مدونة (قصاصات)

مدونة لذيذة كدا... لو بتحبوا مدونتي يبقى هتحبوا تتابعوها برضو  :)

طبعًا التدوينات مش هتبقى كلها رمضانية ... فيها كدا و فيها كدا ...

حسب الظروف و المزاج يعني 

ادعولي ما تدعوش عليّ ...

و كل سنة و انتوا طيبين

و رمضان كريم =)