السبت، 10 يونيو، 2017

بعض من الانتصارات الصغيرة

كلنا نبحث عن الحدث الضخم الذي سيغير حياتنا إلى الأفضل.. الانتصار الذي سنتحول بعده من "محدش عامل لك حساب" إلى "ناس كتير بتسألنا حكايتنا بدأت فين وازاي" متناسين أنه -وباستمرار- هنالك بعض الانتصارات الصغيرة التي تحول مسار يومنا إلى الأفضل وتجعله يومـًا إن لم يكن فريدًا من نوعه فهو جيد.

مثل ماذا؟!

زي مثلا لما أكون نازلة متأخرة على السكشن وحاسة إنه خلاص هتطرد ونازلة نص شعري متسرح والنص التاني منكوش وبجري في كل حتة وأوصل الكلية ألاقي المعيد اتأخر وأدخل عادي وأقعد وأبص له بصة: كنت فين كل دا يا أستاذ؟ مستنيينك من بدري!

زي لما أكون بذاكر سؤال وبدعي ربنا يجي في الامتحان الصبح وأروح ألاقيه أول سؤال في وشي!

زي لما أكون بحاول أظبط أكلي ومش حاسة بنتيجة بس آجي ألبس بنطلون كنت سايباه من زمان فألاقيه وسِع شوية..هيييه!

كمان بحس بالانتصار لما أنقذ اللبن من على النار قبل ما يفور ويبهدل البوتوجاز وأتهزق!

لما أعمل كوباية قرفة باللبن مظبوطة..لا قرفة زيادة تحرق زوري ولا لبن زيادة يقضي على طعم القرفة والسكر مظبوط..يااه على الانتصار ومسكة المج الكفيلة بسرسبة الدفء لأوصالي!

لما أملأ ماية للعصافير وأمشي فألاقيها بتبص لي وبتقولي "صو" .. يعني Thank you بلغة العصافير :D

بحس بالانتصار لما أعرف أضحك بابا وماما على نكتة أو حاجة متخلفة عملتها

كمان كمان في انتصار ونشوة في وش القهوة اللي بيطلع مظبوط ويعدل المزاج..ماهي القهوة مفيهاش غير وِش وريحة..وكافيين طبعا أومال ايه؟!

غير انتصار التغلب على التعب من غير مسكنات وأدوية...لواحدة زيي بتتخيل شكل مركب الدوا قبل ما تبلعه فيجيلها حموضة فورًا يعني!

انتصار إنه حد معجبة بيه من فترة أخيرًا يدخل يكتب تعليق: صورتك دي جميلة :)

أو فرحة تصوير صورة حلوة  بعدستي..الصور الحلوة رزق!

كمان انتصار إنه أخيرًا اتعرفت عن قرب على شخص كان نفسي أصاحبه من زمان! 

أو الخروجة اللي بتظبط بعد شهور من الترتيب والخناق والاعتذار..ياااه..دا أنا ببقه فرحانة بيها فرحة أهبل !!

زي مثلا لما أقنع صحابي يروحوا يجربوا معايا المطعم الفلاني وهم متخوفين بس بعد ما يجربوا الأكل يتبسطوا عشان جربوا نوع جديد !

لما تعجبني جزمة وأدخل أقيسها وتطلع مظبوطة وسعرها حلو..يالللالي يا للالي!

لما أظبط رسمة الأيلاينر.. كمية Selfie رهيبة في اليوم دا بقه :D

انتصار كسر الخشبة في تدريب الويندو لنصين متساويين..هااااااااع *كوكو الضعيف معدتش ضعيف وقادم وبقوة*

لما ألاقي كتاب حلو أخيرًا بعد سلسلة من الكتب الأي كلام وأغرق معاه في كل تفاصيله 

أو مسلسل أو فيلم جميل ياخدك لعالم تاني.

لما خروجة مع الأصدقاء تظبط مزاجك وتطرد الاكتئاب شوية!

بس مش كل الانتصارات حلوة وكيوت..

يعني مثلا إني أعرف أرد على متحرش في الشارع وأوقفه عند حدوده دي انتصار عظيم عظيم يعني! أو أفحم حد في مناقشة من غير ما أضطر أشتمه أو أخسره وأعمله بلوك :D

أو إني أقتل ناموسة شريرة بعد ما حولتني من انسانة طبيعية لحبوب حمرا طالع منها بني آدمة!

لما مش بعرف أحل سؤال في الامتحان وأألف إجابة وأطلع ألاقيها صح أو الدكتور يفتكرها صح :D

أو أفبرك التجربة في السكشن وتطلع صح.. Feeling like a boss 

لما أحرق دم بني آدم حارق دمي بقاله شهور.. آه معلش أحيانـًا مش بعرف أرد في ساعتها وبفضل أهري وأنكت في نفسي حبة حلوين

زي إني بنتصر على الاعتزال الإرادي من الكتابة عشان أكتب التدوينة دي-المختلفة عن أسلوبي في الكتابة عادة -  :)

وانتوا انتصاراتكم الصغيرة ايه؟!


*شكر خاص لـ ريهام سعيد وبالأخص لكتابها (البنت اللي مليانة ديفوهات) عشان قرايته  انتصار من انتصاراتي الصغيرة في أيام الامتحانات الصعبة هذه :)