عارفة انتي الإحساس دا ؟!
لما تحسي إنك مش عايزة حاجة و مش بتعملي حاجة و أصلا أصلا انتي مش انتي ؟!
الإحساس اللي بتحسيه إنك غريبة عن المكان حتى لو مقضية فيه تلات تربع حياتك ؟!
لما تكوني عايزة تغني و مش لاقية أغنية تنفعك ؟!
و ساعتها تبدأ تفكر جديـًا في تأليف الموسيقى ؟!
و ساعتها تبدأ تفكر جديـًا في تأليف الموسيقى ؟!
لما تكوني عايزة ترقصي بس بتغلطي في كل الحركات حتى السهلة منها ؟!
لما تكوني عايزة تكتبي حاجة حلوة فتكتشفي إنك بتحاولي تهربي من القلم في كل مرة ؟!
لما تكوني عايزة تصرخي بصوت عالي في اللي بالك بس توقفي للحظات كدا و تقولي ... "ايه الغباء اللي كنت هقوله دا ؟! " ؟!
لما تكوني وحيدة و انتي حواليكي ألف شخص ؟!
لما تبصي في المراية و ما تعرفيش نفسك ؟!
لما تضحكي و الناس تحب ضحكتك و تقولي لنفسك "بقيتي ممثلة أحسن و خدعتيهم تمامـًا " ؟!
لما تتجنبي الحديث مع كل شخص بتحترميه و تحبيه لأنك خايفة تنفجري في أي لحظة ؟!
لما تطلقي لرجلك العنان و تفضلي تجري و فجأة تلاقيكي خبطتي في حيطة سد ؟!
لما تحاولي تهدي و تدوري على بقايا نفسك ؟!
لما تحاولي تلزقي نفسك ؟!
لما تعرفي إن كل روحك مثقبة.. و لو كانت هناك مرآة للأرواح لكانت مليئة بالثقوب الآن ؟!
ربما تحتاجين إلى الراحة ... إلى أجازة ... إلى مزيد من رائحة الحياة ... و عندها تكتشفين إنكِ محبوسة في غرفة بلا أبواب و لا نوافذ ؟!
ربما ستستغرقين سنوات و أنتِ تحفرين للهرب .. لكن كما دخلتِ إليها بتهور عليكِ التفكير في الخروج ... و حتى تنجحين في الخروج
باستخدام يداكِ العاريتان فقط ... سأصمت و أدعكِ تعملين في هدوء ... و سأكون هادئ جدًا ... فربما كل ما تحتاجيه حقـًا
هي لافتة ( مغلق للتحسينات ) !
نعتذر عن العامية ... فلقد طفح الكيل:)
فعلا افضل تعليق هو مغلق للتحسينات !!
ردحذفووقتها بنتمنى دايماً ان التحسينات دى تحصل وتبقى الحاله احسن بجد
ياااااااااااااه .... معبرة جدًا... بس مغلق للتحسينات دي فيها نوع من التوقف ..التوقف عن مثلا التعامل مع الناس بشكل حلو ...
ردحذفالصعوبة هوالوصول هي أن يكون مفتوحــًاوفــ نفس الوقت في تحسينات ...
وده عاوز إعادة توجيه المسار ... وأخطر مشكلة فيه هو اليأس ... التغلب علي اليأس هو المفتاح ... زي التِعبان بيخرج من جلده من غير ما حد يشوفه ..أو من غير ما تقف حياته ..متاجين عملية " تبلور "
ده رايي .. لو أنا فاهم غلط ..ارجو التصحيح ..