الأربعاء، 30 يوليو، 2014

نـَفسُ ليس كالـنـَفـَسِ



كل ما تيجي تحس إنك خلاص عرفت الدنيا ماشية إزاي وإنك ملكتها،تقوم الدنيا جاية وهوووب..تضربك على دماغك وتقولك "فوق،لسه..انت ما شوفتش حاجة"
كل ما تقول خلاص أنا هلعب دوري صح المرة دي تكتشف إن دورك كان مختلف طول الوقت بس انت ماكنتش واخد بالك!

* * *
صباح الخير/صباح الفقدان

* * *

عز بيقولي "ماتنجرفيش ورا التيار..خليكِ ثابتة على موقفك حتى لو اتقال كلام قدامك يخليكِ تنجرفي"..
بس الموضوع صعب يا  عز!.. "ما أنا عارف" ..هو أنا ليه دايمـًا بتحط في المواضيع الصعبة؟!.. "عشان إحنا مش هنختارها طول ماهي مطروحة قدامنا،فبنتحط فيها على طول"

* * *
أنا بتأثر جدًا بالكلمات..فوق ما تتصوروا!
الكلمات بالنسبة لحد بيكتب لها إحساس مختلف..وقع مختلف على أذنيه..صدى عجيب على قلبه..نغمة جديدة على روحه.
عشان كدا –أرجوكم- لما تيجوا تتعاملوا مع حد بيكتب،خلوا بالكم كويس من كلامكم .


* * *
أنا لا أكتب..أنا أُدمي.


* * *
أكبر دليل على خطأ مقولة إن "الراجل ما بيعيطش" ..إني أنا كـبنت ما بعيطش!

* * *
أنا لست باردة،أنا أحب الحدود والوضوح فحسب.
لست صديقي فلا تتوقع مني معاملة صديق ولست حبيب فأتعامل معك معاملة الحبيب..أنت شخص غريب عبر الحاجز إلى حياتي إذن توقع أن أعاملك كشخص غريب إلى النهاية.


* * *
بدأت أخاف مما أدعو به..بطريقة ما أو بأخرى أبواب السماء تكون مفتوحة لتسمع دعوتي إلى مـَن كـَتب لهم القدرُ الرحيلَ.

* * *
ليس كل من يموت قد وصل للحكمة.

* * *
أنا عاملة زي اللي بيجري وبيتمرن على الجري كتير وييجي واحد في نص التراك يقف ويقوله : "اجري براحتك بس انت عمرك ما هتدخل الأوليمبياد..عمرك ما هتاخد ميدالية...هتفضل هاوي..عمرك ما هتدخل الأوليمبياد"

* * *
"اجري يا ابن آدم جري الوحوش..غير رزقك لن تحوش"

* * *

من أهم الدروس التي تعلمتها في الجبل الخامس..أن تخلص من أشباحك!
طول ما انت حاطط في دماغك كابوس ما..شبح ما..خوف ما..طول ما هتلاقي رجليك "بتفرمل" كل ما تيجي تاخد خطوة لقدام.


* * *

 تركتُ روحي داخل حضنك..فحافظ على نفسك بقدر رغبتك في الحفاظ على روحي.


* * *
-يعني انتِ لما تبعدي بتعرفيني قيمتك عندي؟!
-    لا،أنا بعرف قيمتي عندي.

* * *

مدرسة اللغة الإنجليزية جات في مرة وكتبت لي على المذكرة كاتب بالانجليزي يعني Man of letters
بصيت لها يومها ببهجة فقالت لي : أول ما لقيتها افتكرتك وقلت لازم أعرفهالك.
وقامت كتبت تحتها Woman of letters
Saraaaaaaaaaaaaaaaaaaaaaaa
 وفضلت تكتب في حرف الـa لغاية ما الصفحة خلصت .

أنا بحب مس هناء جدًا..بطريقة هي مش متخيلاها !


* * *

الكلمات كلمات،الأفعال أفعال،والمشاعر مشاعر..ونحن هم!

* * *

وطقس الكتابة لا يكتمل دونك!

..-

ليست هناك تعليقات:

إرسال تعليق