الأحد، 8 يوليو، 2012

مستنيّ إيه ؟!




بتبص على مين ؟!

مستنيّ إيه ؟!

 مش قلت لك مش جاي ؟!

روّح خلاص و مش هيرجع تاني..

قالك أنا زهقت .. قالك أنا رايح و مش راجع تاني ..

و انت قلت له إيـّه ؟! قلت له استنى لما تاخدني معاك ؟!

زعقت فيه يومها و قلت له "خمسة كمان" ..

قالك "لأ ، مش وقته"

و انت واقف هنا مستني شخصه ... و لا مستني أمل انتظاره ؟!

 و اللي ودعّوه كانوا مين ؟! 

كانوا إخواته و أحبابه و أصحابه .. حلـّفوا لا يرجعوا حقه وحق اللي راحوا

يومها انت سكتّ.. و أنا سكتّ .. و كلهم سكتوا ..

كان صوت الرحيل أقوى منـّا .. كان أمل فراقه أصعب حاجة حصلت لنا ..

فاكر انت قلت إيه يومها في وداعه ؟!

قلت إنه قالك تستناه عشان توصله ...

بس ما قالكش توصله فين !!

قالك تستناه عند المحطة .. 

بس ما قالكش أي محطة !!!

و دلوقتي قاعد على أمل إنه جاي ..  

على أمل إنه فاكر ميعادك معاه ..

يوم رحيله ، صاحبك لف ناحيتنا ..

صاحبك الشديد القوي دا .. فاكره ؟!!

قالك و قالي إيه يومها ؟!

قالنا ما تخافوش .. احنا صامدين و حقه هيرجع ..

إدّانا أمل ابن الإيــــه .. بس أول ما مشي و سابنا ..

احنا الاتنين ضعنا... اختلفنا .. اتخانقنا ...

روحنا نتفاهم معاه .. فضربنا .. !!

و خلّى الحارس اللي رحّل صديقنا يحبسنا و يضربنا ..

قمنا هتفنا "يا نجيب حقهم يا نموت زيهم" ...

قام صاحبنا قالنا "هه، طول ما انتوا كدا .. مفيش حق ..في موت بس !!"

بصّينا لبعض .. كنا صادقين لما قلنا نموت زيهم .. بس قلنا نسمع اللي عنده

التفتنا له قام قالنا "ادعموني..امنحوني ثقتكم و قوتكم و أنا هجيب حقه و حق اللي زيه"

ما انتبهناش ساعتها إنه خانـّا .. إنه تحالف مع الحارس اللي رحـّل صاحبنا !!


تحالفنا معاه .. نسينا خلافاتنا و تنازلنا عن جزء من قناعاتنا الشخصية..

 عشان حق اللي راح و مارجعشي ..

لكن أول ما اتمّكن صاحبنا .. رمانا... أول حاجة عملها إنه لف ع الحارس سلم عليه و باسه .. 

و قاله شكرًا على مجهودك معايا !!

طب بتشكره ليه ؟! مش إحنا أولى بالشكر ؟! 

مش إحنا اللي أيدناك ؟

مش إحنا اللي ضغطنا على كرامتنا عشان خاطرك ؟!

مش كان صاحبنا أولى إنك تدور على حقه .. ؟!

و بعدين استنى !

دا راح و جاب أصحابه اللي الحارس طردهم قبل كدا !

إيه ؟! خلاص ؟!

صدقتم نفسكم ؟! نسيتوا عداوتكم مع الحارس و اضطهاده و ظلمه لكم و لنا ؟!

و بعد كدا يقولك ... استنى .. أنا بخطط عشان أجيب حقك !

بتخطط إيه يا صاح ؟! شايفينك طردنا .. شايفينك بتقولنا يلا برا ...

برا أرضنا !!

و تيجي تقولي لسه بخطط ؟!

ما تزعلش يا صاحبي إن كان صاحبنا خان ... ماهي دي الحياة ..

و دا اللي صاحبنا رحل بسببه و هان ..

هان على غيره يكرموه .. يجيبوا حقه و يدفنوه ..

دفنوه يا صاحبي في التراب من غير عزا و لا بكا ... و التراب كله اتملى بخداعهم ..

خونوه قبل ما يرحل .. و لما رحل .. برضو ما عتقوه !

دفنوا حقه .. و بعد ما دفنوه ..جايين يدفنونا إحنا كمان بالحيا !

هتقول إيه يا صاحبي بعد اللي اتقال ؟!

و هتعمل إيه بعد اللي اتعمل ؟!

 أحسنلك تمشي ...

أصلك مستني إيـّه ؟!

مش قلت لك إنه مش جاي ؟!








ليست هناك تعليقات:

إرسال تعليق