الجمعة، 30 سبتمبر، 2011

لأن المنصورة ممكن تكون أحلى بأهلها ...




تحولت مدينة المنصورة من مدينة جميلة إلى مدينة قميئة !

و ذلك بسبب الممارسات الخاطئة لبعض أو كل الناس تقريبًا .

بدايةً من رمي القمامة في الشارع و حتى حرق قش الأرز .

المشكلة أن الناس نفسهم لا يفهمون أن هذا يضرهم أولاً .

حاول أن تمنع رجل الشارع من رمي القمامة في الشارع و ستفاجأ بأنه يلقي اللوم على الحكومة . حاول أن تقنع سائق تامسي

أن الوقوف وسط الشارع لحمل الركاب خطأ و ستجده ينفجر فيك صائحًا بأن المرور هو السبب و أيضًا ستفاجأ بأن ركاب التاكسي

يدافعون عن نظرية سائق التاكسي و يؤيدونها بل الآن يصل الموضوع إلى سب الثورة و إنها السبب في خراب البلد !

" طب هي البلد كانت عدلة أوي قبل الثورة مثلاً ؟! "

مشاكل المنصورة كثيرة حقًا منها : 

1) زحام و تكدس .  2) قمامة في الشوارع .  3) مواصلات مقرفة . 4) تكاتك في الشارع .

5) تناحة السواقين . 6) لا مواقف للسيارات .  7) غياب الدور الثقافي عن الشارع .

و مشاكل أخرى ... !

اليوم سأتكلم عن القمامة ، بجانب سور مدرستي مباشرة مقلب قمامة عملاق و يمتليء المكان داخل المدرسة بالحشرات و القاذورات

و الرائحة المقرفة و عندما تحدثنا مع المحليات وعدونا بحل المشكلة و فرض عقوبة على من يلقي القمامة و لكن لا حياة لمن تنادي !!

المشكلة الآن ليست في المحليات فقط بل هي أولاً في المواطن المصري الذي يعتقد أن التخلص من القمامة هي مجرد التخلص منها 

خارج حدود المنزل و ليذهب العالم الخارجي إلى الجحيم !

كلما حضرت سيارة القمامة و لملمت القاذورات الموجودة ، بعد 15 دقيقة تجد المكان قد امتلأ مجددًا بالقمامة ...لماذا ؟!

لأن المصري لا يعتقد أن رمي قاذوراته (نعم !؟ ...متضايق من الكلمة ؟!...أيوه ، قاذوراتك انت) خارج منزله سيحميه لكن الحقيقة

أن هذه القاذورات

يتجمع حولها الذباب...يحرك الهواء محتوياتها ... تـُحرق .. تنتشر على الأرض ... كل هذا يجلب الأمراض يا عزيزي !

ألا تعي بأن قاذوراتك يمكن أن تسبب أمراضًـا مزمنة لطالبات المدرسة الثانوي بجانب  "مقلب زبالة حضرتك" ؟! 

ألا تعي أيـضـًا أنها يمكن أن تسبب السرطان و العقم و الالتهاب الرئوي و غيرهم ... ؟!

ألا تعي كل ذلك فأنت جاهل !

كلما نظرت إلى شوارعنا ، وجدت بجانب سور كل مدرسة مقلب قمامة ... طب من ايه دا ان شاء الله ؟!

و هذا يدفعني للتساؤل ...

لماذا يحلو للمصري أن يـُلقي بقاذوراته بجانب صندوق القمامة و ليس بداخله ؟!

لماذا يحلو للمصري إلقاء قاذوراته بجانب سور المدارس !؟

و لماذا أيـضـًا يـُلبي نداء الطبيعة بجانب أسوار المدارس و المستشفيات ؟! ( ليه مش مكان تاني...مثلاً يعني مكان قريب كدا...

في شارع البحر في مبنى كدا ... بلاش أقوله أحسن أروح في داهية ! ) .... يعني ليه مش بيدخل مطعم و لا حاجة ؟!

لماذا لا يفهم المصري أن قاذوراته التي يلقيها في الشارع ستمرضه و تضره أولاً ؟!

أنا لا أريد أن أسبب لكم الإحباط في هذه المقالة لذلك سأقترح عليكم بعض النقاط للمساعدة في نظافة البيئة لكن أنتم وحدكم من 

يستطيع تحديد النقاط المناسبة للحفاظ على نظافة المنصورة :

1) كيس صغير بلاستيك معاك في العربية ترمي فيه و بلاش ترمي في الشارع .

2) أرجوك ما تتفش (spit أي تبصق) في الشارع .

3) أرجوك ما تعطسش أو تكح في ودن حد أو في وشه ... لما انت بتعمل كدا و ماحدش بيعلق مش معناه إنه متقبلها منك ...هو بس 

عايز يقولك يا قليل الأدب  احترم نفسك بس خايف تزعل منه ! 

4) بلاش ترمي المنديل (اللي عطست أو تفيت فيه) في الشارع و دور على أقرب صندوق قمامة ترميه فيه

" لو بتقرف تمسكه أو بتقرفي تمسكيه "

5) بلاش تحط برفان طول ما انت رايح و جاي و ترش معطر في البيت عمّال على بطّال .

(حضرتك كدا بتخرم طبقة الأوزون و هتضطر تشتري تكييف السنة الجاية لأن الجو هيبقى حر بزيادة و بكدا تحويشة عمرك 

هتضيع ... مش في شراء التكييف ...لأ دي مقدور عليها دلوقتي التكييفات بالتقسيط ...انت حضرتك هتخلص الفلوس على شركة

الكهربا اللي ما هتصدق ترزعك فواتير عالية أول ما تلاقي عندك تكييف . )

دي بعض الاقتراحات البسيطة ... و مستنية آرائكم ...أي إضافات ؟!!


هناك 4 تعليقات:

  1. - "حاول أن تمنع رجل الشارع من رمي القمامة في الشارع و ستفاجأ بأنه يلقي اللوم على الحكومة " هنا المسألة مش مرتبطة برجل الشارع بس علي فكرة بالعكس ممكن تلاقي ناس مثقفين ومتعلمين بيعملوا نفس التصرف ومش هقولك بيتناسوا انه تصرف خاطئ لأ مش بيخطر في بالهم أصلا انه تصرف خاطئ .


    "لماذا يحلو للمصري أن يـُلقي بقاذوراته بجانب صندوق القمامة و ليس بداخله ؟!" السؤال ده ماعنديش عليه تعليق أكتر من شر البلية ما يضحك !!!!!!


    "كيس صغير بلاستيك معاك في العربية ترمي فيه و بلاش ترمي في الشارع" دي بقي مش مشكلة خاصة دي مشكلة أمة بحاله .. أنا لو راكب عربية مع حد من اصحابي مجرد انك تقترح اننا نقف عشان نرمي حاجة في صندوق هتتقابل بنظرات الاستهجان والدهشة .. المثير للسخرية ان ممكن اللي راكب العربية ده يكون معاه كيس بلاستيك فعلا ويجمع فيه المخلفات فعلا بس في الآخر بيطيح بيه برضه من شباك العربية !!!!!



    ملخص اللي عايز أقوله لما المتعلمين واللي المفروض مثقفين يعني يلتزموا بده الأول نبقي نطلب من عامة الناس تلتزم بيه بمعني .. أبدأ بنفسك أولا

    ردحذف
  2. هيا مش مشكله المنصوره بس
    هيا مشكله كل مدن الجمهوريه
    والحل ان واحد او اتنين يبتدو بنفسهم
    ومن جوه بيتهم هتلاقي الحال كله اتعدل

    ردحذف
  3. الافكار دي كلها تمام
    وانا معلكي فيها
    بس انا عن نفسي بفضل ماسكة الحاجة في ايدي لو منديل او ورقة وافضل ماشية حبة كتير ادور على صندوق ارمي فيه مش بلاقي
    فهنا تيجي مشكلة الصناديق
    طيب ايه حلها
    لو جينل مثلا للمددارس لو جمعنا من كل طالب ربع جنيه عشان نجيب صناديق زبالة تتحط في الشارع اللي فيه المدرسة
    شوفي هنجيب كام واحد
    ويتبلغ بيهم المحليات بحيث يتنظفوا اول بأول
    اولا الطالب او واحد هيلاقي حاجة يرمي فيها ف الشارع
    الطالب نفسه هيلاقيه بيدفع فلوس عشان يخلي المكان نظيف
    هتبدأ ثقافة النظافة تزيد
    لو جينا على شوارع المحلات وطلبنا ودي من كل محل ولو خمسة جنيه او 10 جنيه عشان بدردو نعمل نفس الفكرة
    كل عمارة تعمل بردوا كدا

    حاجة كمان فاكرين ايام الثورة لما حملات النظافة اشتغلت وبقوا لبنات والولاد ينزلوا الشوارع ينظفوها يوم الجمعة
    ايه المشكلة لما نرجعها تاني
    المدارس تعمل معسكرات للشوارع اللي هيا فيها
    الطلبة هتخرج وهتبقى فرحانة كمان
    أولياء الامور لما يعرفوا كدا ويشوفوا ولادهم بيخرجوا يعملوا كدا
    لما هييجي هوا بقى يرمي الزبالة مش هيرضى يرميها الا في الصندوق عشان ميخليش ابنه او بنته يوطوا ع الارض يشيلوها
    والبنات والولاد كمان مش هيرموا حاجة ف الارض لانهم تعبوا في نظافة المكان ده فهيحافظوا عليها
    وحبة حبة ثقافة النظافة دي هتنتشر وهتبقى حوالينا كلنا
    الدنيا هتبدأ تنظف
    الاجيال الجديدة لما هيجوا هيتعودوا على كده
    الدنيا نظيفة والخضرة حواليهم
    فبالتالي هما كمان هيحافظوا على نظافة المكان


    الافكار كتيرةة أوي بس عاوزة التنفيذ وانا مع اول حد هيقول يلا وانا معاه

    ردحذف
  4. كمان البنات والولاد في الجامعة
    واللي خلصوا
    الحكاية يوم واحد في الاسبوع
    واللي عاوز يزود براحته
    المهم انه يحس بالحاجة اللي بيعملها ويلاقي لها نتيجة

    ردحذف