الأحد، 4 ديسمبر 2011

في وداع My Sweet sixteen



النهارده أتميت عامي السابع عشر ... ياااه أنا كبرت أوي !
كدا خلاص اللي هايجي يسألني عندك كام سنة ؟ هتردد قبل ما أجاوب و يمكن أقول 12 !
هه عادي بقه !
السنة دي بجد كانت ممتعة ، آه صحيح ماعملتش حفلة في عيد ميلادي لأول مرة من كام سنة كدا و أعتقد السبب أيامها  إني كنت مشغولة جدًا بموضوع الجودة في المدرسة مع الامتحانات و مكنش في وقت و بعد كدا جات ثورة تونس و لخبطة كدا و بابا كان مهتم بثورة تونس و من مبدأ (عيب ماينفعش نحتفل و تونس فيها مظاهرات) ... المهم محصلش احتفال و السنة خلصت !
بس السنة كلها كانت احتفال =)
أنا السنة عندي بتخلص بعد يوم عيد ميلادي .... يعني أي حدث بعد كدا السنة دي انسوا اني أفتكره أصلا !
خلاص بفرمت الجهاز "أي مخي" و بنزل عليه ويندوز جديد للسنة الجديدة .
بداية من ثورة تونس مرورًا بثورة مصر و بعدها كل بلدان العالم العربي ثم العالم كله و مظاهرات و كتاب هيتطبع و مدونة بتنتشر و تكريم في المدرسة ... إلخ
بجد كانت سنة مليانة شغل و زحمة بس كانت حلوة ... حلوة جدًا كمان =)
و لأن دا عيد ميلادي السابع عشر قررت أكتب 17 أمنية نفسي يتحققوا (أول 8 أماني نفسي يتحققوا السنة دي و الباقيين بعد كدا بسنوات...) ...
1- مصر تفضل مصر و تسليم السلطة لحكم مدني منتخب
2- إلغاء المحاكمات العسكرية للمدنيين "بجد" و إحالتهم للقضاء المدني .
3- تطهير الداخلية
4- تطهير القضاء و استقلاله .
5- تطهير الإعلام و استقلاله "بجد" .
6- بثينة كامل أو البرادعي يبقى رئيس جمهورية مصر القادم .
7- أنجح في الثانوية العامة بتفوق .
8- ما أتحسبش غياب في المدرسة .
9- أدخل كلية كويسة بحبها و أشتغل شغلانة بحبها .
10- يبقى عندي عربية باسات و شقة على النيل .
11- أشتغل في برنامج آخر كلام مع يسري فودة أو مكانه... "معنديش مانع يعني" .
12- خدمة انترنت اتصالات تتحسن و يجيبولي تليفون أرضي عشان أركب نت عدل .
13-أخلص كام رواية كدا بكتبهم .
14-العيلة تفضل تدعمني في أسوأ و أفضل حالاتي .
15- ألاقي صديقة العمر.
16- أتجوز اللي بحبه و بيحبني P: و أجيب بنت و ولد عينهم زرقا و شعرهم أصفرXD ..."بلاش تحطموا أحلامي وتحطموها على صخرة الواقع المرير ... D:"
17- الستر و الرحمة من عند ربنا و أدخل الجنة .

ايه دا ؟! السبعتاشر أمنية خلصوا بسرعة كدا =( ؟! دا أنا كنت لسه هبدأ ...

هيييييه يلاا .. معلش بقه ... السنة الجاية هيبقى عندي أمنية زيادة أبقى أحطها بقه نياهاها .

في النهاية أحب أشكر كل واحد قالي (كل سنة وانتي طيبة) النهارده =) بجد أدخلتوا البهجة على قلبي
شكرًا شكرًا شكرًا :*

و هابي بيرثداي تو يو سوسو

و حالا بالان حيوا أبو الفصاد أن أن

هناك 6 تعليقات:

  1. يارب يا ساره تحققى كل امنياتك دى
    وتكونى زى ما بتحلمى دايماً
    ربنا يوفقك يا جميله يااارب
    وكل سنه وانتى طيبه :))

    ردحذف
  2. كل عام وانت بخير وعقبال العمر كله يارب ..

    وربنا قادر يحقق لك كل أحلامك وأمنياتك يارب وخاصة بتاعة " يسري فودة " ههههه

    ردحذف
  3. ده انتى طلعتى صغيره قوى...اراءك تدى احساس انك اكبر :)

    ردحذف
  4. كل سنة وانتى طيبة يا سكر
    وعقبال سنين كتييييييير حلوة تحققى فيها أحلامك دى
    وال 17 الف امنية يتحققوا مش 17 بس :]
    أول مرة اجى عندك بس شوفتك عند كذا حد قبل كده :)
    مش هتبقى اخر مرة :)

    ردحذف
  5. كل سنة وانتى طيبة ياسارا

    معقول 17 سنة بس وبتقولى انك هتترددى قبل ما تقولى سنك ياحبيبتى انتى لسة بدرى اوى ع الكلمة دى ..

    ربنا يحققلك كل احلامك يابنوته .

    ردحذف
  6. @Bent Men ElZman Da !!

    يارب يا دندن يا رب :)

    و كل سنة و انتي طيبة :*


    -------------------------------

    @وجع البنفسج

    ههههههه أيوا

    الأستوديو الكبيييييير و الميكروفونااااااااااات :D :D

    كل سنة و انتي طيبة :*

    -------------------------------

    @د/دودى

    شوفتي بقه :) ؟!


    كل سنة و انتي طيبة :*

    -------------------------------

    @Miss LoZa

    و انتي طيبة يا لوزا :)

    هههههه ان شاء الله ما تكونش آخر مرة

    مستنيه زياراتك ع طول :)

    -------------------------------

    دعاء مواجهات @

    و انتي طيبة يا دودو :*

    هههههههه ... و الله الواحد كبر خاالص

    يا رب :)


    ميرسي ع الزيارة الحلوة دي يا بناتيت

    ربنا يخليكوا لي ع طول كدا :*

    ردحذف