السبت، 8 أكتوبر 2011

سنة حلوة يا جميل

في اليوم دا من سنة 2010 نقلت مدونتي الصغيرة (قلم سارة) للبلوجر ،،

قلم سارة كانت مدونة صغيرة غير معروفة إلا للأصدقاء المقربين فقط على (ماي سبيس) المتاحة على الهوتميل

و كنت مبسوطة بوجودها هناك ، صحيح هي صغيرة و ماحدش يعرفها ، لكن دا كان بيديني مساحة حرية كبيرة

إني أكتب فيها اللي أنا عايزاه و محدش له عندي حاجة .

حقيقةً ، أنا ما بدأتش التدوين من سنة أو اتنين ،، أنا بدأته من فترة طويلة لكن كانت تدويناتي مشردّة صغيرة

قصيرة و عادةً بتتكلم عن أحداث مضت ، زي يوم مسابقة حضرتها أو يوم مسرحية عملتها أو غيره .

أما المدونة و اللي كان اسمها قبل كدا (بنات مصر) ثم تحولت لـ(صفحتنا) و كانت مخصصة في البداية لبنات

مدرستي و بعدين اتنقلت و بقت مجلة باسم (صفحتنا) و لما ماحدش شارك إلا أنا و واحدة صاحبتي بس ،

اتفقنا بدون اتفاق ، نفك الشراكة و كل واحد يمتلك مدونته الخاصة ، و هكذا تحولت مدونتي إلى مدونة جديدة

و المفروض باسم جديد !

و احترت كتير أسميها ايه ، كنت عايزة اسم يخصني لأني كنت متحمسة أنشر فيها تجاربي القصصية و اخترت

كذا اسم و فضلت لمدة يومين أنا و صاحبتي (لطيفة) نبحث في الأسماء ، و هي تشجعني و تحاول ما تحبطنيش،

لغاية ما قررت أسميها (قلم سارة) ..  و هكذا بدأت مرحلة التدوين في المدونة .

التجربة كانت جديدة ، و جميلة كمان ، فهي حفظت لي حقوقي كمدونة و في نفس الوقت بقيت عاملة زي اللي

عنده بيت جديد ، كل يوم يروح يظبط فيه حاجة ، يلونه ... ينظفه ... يغير منظره ... و بقيت مبسوطة جدًا

بمساحتي اللي بقت عاملة زي البيت الجديد بجد .

و في إحدى أيام شهر سبتمبر 2010 فاجأني الهوتميل بقرار عجيب ! إنه هيلغي المدونات من عليه خلاص

و هيعمل شراكة مع الوورد برس و ينقل لها كل المدونات ، و كانت لي تجربة قديمة مع وورد برس في مدونة

واحدة صاحبتي كنت معاها فيها و بصراحة ما اتبسطتش فيه و قررت ألم عزالي و أنقل من الهوتميل خالص و

جيت استقريت على البلوجر !

و كانت من هنا بداية فكرة التدوين المنتظم ، صحيح ما نقلتش كل التدوينات القديمة و نقلت بعضها فقط و لكن

و حرصت إن مفيش شهر يفوت دون ما أكون مدوِنة على الأقل

تدوينة واحدة جديدة.

و بدأت رحلتي مع البلوجر و مدونة قلم سارة بشكلها الجديد عليه ، و بدأت أكتب و أكتب و أعرف مدونين كتير

و الناس بدأت تشجعني و تقولي "اكتبي" رغم إني كنت شايفة إن كتابتي مش اللي هي بس تشجيع الناس خلاني

أكمل .

في دماغي كلام كتير عايزة أقوله لكن بصراحة أنا جاية النهارده أكتب التدوينة دي عشان أقولكم كلكم

شــــكــــــــــرًا

كل الناس اللي شجعتني

و كل الناس اللي قالت لي رأيها سواء بالإيجاب أو بالسلب

لكل واحد كلف نفسه و اقتطع من وقته و لو دقيقة عشان يقرا كلمة مكتوبة في المدونة

لكل واحد قالي (كملي يا سارة) و شجعني

لكل الناس اللي ألهمتني و لسه بتلهمني و هتلهمني في الكتابة

الحمدلله إني قدرت أوصل و لو كلمة لكم ، مش مهم تتفقوا معاها ، المهم تخليكوا تفكروا و تعرفوا إن في ناس

رأيها مش ضروري يبقى زي رأيك بس رأيها لازم يوصل و يُحترم .

أنا مدونتي مش سياسية و لا اجتماعية و لا أدبية و لا فكاهية و لا أي حاجة من دول ،

هي مدونة عاملة زي طبق الفاكهة مليانة من كل صنف أو زي الأمم المتحدة من كل بلد مندوب :D

مدونتي زي شخصيتي بالظبط ، شخصية مش بترغي 24 ساعة في السياسة و مش بتضحك 24 ساعة برضو

و لا هي مصلحة إجتماعية و لا بتكتب زي نجيب محفوظ ولا ليها أي خبرة في الحياة .

16 سنة و 9 شهور و 4 أيام هو عدد نصيبها في أيام هذه الحياة ، خلّتها تكون وجهة نظر عن حاجات كتيرة فيها

ممكن تكون صح ... ممكن تكون غلط ... ممكن ما تكونش حاجة أصلاً !

بس هو صوت من كام مليار صوت موجود على وجه الكرة الأرضية عايز يتسمع .


شكرًا ليكم

كنت حابة أذكركم واحد واحد بالاسم ، بس خايفة أنسى حد

عشان كدا عايزة أقول لكم كلكم شكرًا و أنا مش بنسى حد قالي كلمة حلوة أو وحشة

و دلوقتي هصدّع راسكم شوية :D بس في كام مدون لازم أذكرهم في هذا المقام

سارة فوزي

ياسمين جمال


و غيرهم :)

أقولهم كلهم :

Thanks for inspiring me
 

 حتى لو بعضهم ما دخلش و ما شافش الشكر بس أنا بشكرهم كلهم

و شكرًا لكم لأنكم قررتم تشرفوني النهارده بزيارتكم لي في المدونة

شــــكــــــــرًا

و أحب أقولكم في النهاية كلمتين خلوهم على طول في بالكم

اليوم اللي يعدي من غير ما تعمل فيه خطأ يبقى انت ماتعلمتش فيه حاجة

وبس ،، :)


بدأنا سنة جديدة

ع جنب : مش ملاحظين إن الهيدر اتغير ؟! :D

هناك 10 تعليقات:

  1. تغنى ابو الفصاد تانى و لا ودانكو وجعتكو :D
    بصى بقى يا ستى انتى من الناس الى بستمتع بالقرايه لمدونتها و حاجتك انتى بالذات لازم جنب كوبايه الشايه او القهوه سبحان الله معرفش ليه بس لازم اعدل المزاج و انا بقراها ,, انتى فعلا يا ساره بتمتعىنا بالى بتكتبيه و استمرى و احنا وراكى وراكى مطرح مطروحى وراكى :))

    ردحذف
  2. سنة حلوووة يا جميييييل
    سنة حلوووة يا سااارة
    سة حلوووة يا جميييل :)

    كل سنة و أنتى مبدعة دايما يا سارة
    أنتى مدونة و كاتبة و بنوتة مميزة و موهوبة بجد
    و ان شاء الله كل سنة تبقى أكبر و أكبر
    لحد ما أمسك كده ان شاء الله كتاب ليكى و أقراه
    و أقول انا عارفاهاا D:

    و مش عارفة أشكرك ازاى على الشكر ده :)
    بالعكس اتى كنتى من الناس اللى ألهمونى :)

    <3<3

    ردحذف
  3. بصي يا سارة باشا اولا باشكرك وانا قريتها وعنيا دمعت وكدت ابكي بجد عشان انا حاسة بكل كلمة قولتيها وعلي كلامك وتعبيرك الصادق وبجد مدونتك هتكبر بكتاباتك وبتألقك وانتي هتبقي مصدر لإلهام ناس كتير لاني مقتنعة ان المستقبل هيبقي في الإعلام الالكتروني بصورة كبيرة وبجد انا باشكرك علي كلامك الجميل واكتر فقرة عجبتني تلخيصك لشخصية المدونة التي تشبهك واللي انا شايفاها رائعة لانها تعكس طموح إنسانة مصرية عربية مثقفة ومودرن وصدقيني انا فخورة بيكي جدا لأن رغم صغر سنك بدأتي في الكتابة وبقي ليك اسمك في عالم المدونات لدرجة ان في ناس في كليتي بيقرأو لك وبجد انتِ نشيطة ورائعة وبالتوفيق ومستنياكي تنوري كلية إعلام القاهرة وده هيشرف كلية إعلام صدقيني

    ردحذف
  4. كل سنه واحنا طيبين
    يلا نطفى الشمع
    ويارب من نجاح لنجاح
    تحياتى

    ردحذف
  5. كل سنه وانتى ومدونتك بخير

    وبقولك اهون علشان السنه الجايه تكتبى اسمى فوووق


    اكتبى يا سااااااره

    وحسابنا بعدين
    هع هع ^_^

    ردحذف
  6. كل سنه ومدونتك بخير ^___^
    وان شاء الله تعدي سنه ورا سنه
    واحنا نعد نقرأ فيها لحد كده منكون عواجيز :P
    واستمري وان شاء الله هتلاقي متابعين لكِ اكتر واكتر ^__<

    ردحذف
  7. كل سنة وانتى وقلمك بخير يااااااااااااارب ويكبر اكتر واكتر واشوفه أكبر وأجرئ قلم فى الدنيا دى كلها
    ..................المهم يبقى شيلى ليا حته من الجاتوه الله يكرمك ^ـــــ^

    ردحذف
  8. سنه حلوه عليكى يا ساره
    وعلى مدونتك كمان يارب
    وتكونى مبدعه ومتألقه دايماً كعادتك
    وتفضلى تتحفينا بكتباتك على طول كده :)
    مش محتاجه حد يقولك كملى
    عشان انتى اصلا المفروض تكونى متاكده وعارفه ان كلامك حلو اوى ويستحق انك تكملى

    مش عارفه اقولك ايه على الشكر ده
    بس انا اللى بشكرك عشان قريت لحد زيك بجد :)

    ان شاء الله السنه الجديده دى
    تكتبى فيها اكتر واكتر من اى سنه فاتت
    ربنا يوفقك يااارب :)

    انا فعلا ماخدتش بالى من الهيدر الا لما قولتى :D

    ردحذف
  9. كــــل سنه وهى بخير ياقلبي
    عقبال مليون سنه يارب

    ردحذف