الاثنين، 28 مايو، 2012

من القلب

ملحوظة مهمة جدًا قبل القراءة : لو بتتصفح المدونة دي لأول مرة فأنصحك ما تقراش الكلام دا .. لأنها فضفضة كدا لا تدل على شيء و لا تقيس أي رأي !

----------------------------


اليومين اللي فاتوا كنت على أعصابي أوي أوي و كنت بعيط كتير و محبطة و بتشاكل مع دبان وشي .. تقريبـًا اتخانقت مع كل الناس !

كل ما أكلم حد أتخانق معاه .. كل ما حد يقولي صباح الخير ..أقوله و كمان بتقول صباح الخير ؟!

لغاية ما وصلت لقمة الضياع لما صاحبتي بتقولي إزيك يا سارة؟ رديت عليها و عليكم السلام و رحمه الله و بركاته -____-

و ساعتها قلت لازم أفضفض شوية و أفك الخنقة دي ...

أعصابي تعبانة بما فيه الكفاية و برتجف لوحدي ... الدنيا فجأة بقت غامقة :(

كل دا بسبب الانتخابات ؟!

آه بس بزيادة بصراحة من ردود أفعال الناس اللي حوليّ ... مكنتش متوقعة المواقف الغريبة دي

و ناس بدأت تدعم شفيق و آخرون مع مرسي و البعض مقاطع ..

المقاطعة حل و أنا معاه حاليـًا ... نروح نبطل صوتنا

في ناس من حملة دعم صباحي قالت لي محتاجين 6 مليون صوت باطل ... الموضوع محتاج حشد

و مش كل الناس هتستجيب للحل دا .. بس لازم نحاول عشان نعيد الانتخابات

أو ع الأقل نوضح لهم إننا هنا و نبقى زي العيل الفقري اللي لا عايز "يشرب" و لا عايز "ينام"

شفيق مسئول سياسي عن موقعة الجمل و الإعلام غلط لأنه سكت عليه طول الشهور اللي فاتت دي و ما اتكلمش إلا لما 


محمد فتحي اتكلم عن الموضوع دا مع يوسف الحسيني في صباح On tv 


و مرسي جماعته تخلوا عننا في محمد محمود و مجلس الوزراء و بعد ما دخلوا البرلمان اشتغلوا عشان مصلحتهم بس


كلهم بشكل أو بآخر ملطخين بالدم... بالدم المصري !!

كل واحد هينتخب حد من الاتنين دول له أسبابه طبعـًا لكنها أسبابـًا لا تقنعني أنا !

كمان اللي صدمني من المقاطعين و مع ذلك بيدعموا شفيق أو مرسي .. إنهم مقاطعين !!

يعني المفروض يبقوا حياديين لا مع دول و لا مع دول .. ولا حتى يقولك أفُضل فلان !!

اتصدمت :(

و اتصدمت أكتر من الردود الندلة من نوع أنا مظبط نفسي و أنا هخلع ... إلخ

خلاص ؟!! نسيتوا الثورة فجأة ؟!!

نسيتوا دم الشهداء و مصابي الثورة ؟!

كل واحد بيدور على مصلحته ؟!

طب أنا قطعت نفسي للثورة دي ... الثورة هي حياتي و حياتي هي الثورة

يا إما تنجح و أنجح معاها يا إما أموت و أنا بحاول ...

الثورة هي طريقة التقدم الوحيدة لمصر ... الطريقة الوحيدة عشان مصر ترجع عروسة حلوة بين الأمم

هي حلم جميل أوي ... أجمل من الحياة ذاتها

إزاي ما أتمسكش بيه لآخر لحظة طيب ؟!

الانتخابات مش معناها إن الثورة انتهت و ماتت ... لا...

لما اتقالت لي حسيت إن حد جاب سكينة و طعنّي في قلبي !!

الثورة مستمرة ... بطرق آه مختلفة بس مستمرة لأن اللي قاموا بيها لسه أحياء 

قدامنا سكك كتيرة نبدأ منها ... الدستور و المحليات و توعية الناس ... هنحاول و نجتهد...

و لآخر نفس يتردد داخلنا !

حتى حمدين صباحي اللي هو المفروض خسران متفائل و منشكح ... يبدو إن خبرة النضال أكسبته جرعة أمل و عدم يأس من 


الحياة و الجوالات المختلفة فيها .. بس أنا مش زعلانة على حمدين .. أنا زعلانة من اللي حصل كله !! 


من الأول خالص زعلانة !
أنا زعلت من الشعب و حزنت على مصر ...  و قلت في لحظة تهور إني عايزة أسيب مصر خلاص

رغم إني مش قادرة أتصور جنسية تانية جمب "مصرية" و لا بلد تانية تاخد مجهودي غيرها ... بس هعمل إيه !

شعبك يا مصر ما بيحبنيش ! و لا بيحب أصحابي !

حتى الحاجة الوحيدة اللي كانت ربطاني بمصر ... أهلي ... أهلي اللي في الميدان

تفرقوا و تشتتوا و كل واحد بقه بيدور على مجد شخصي ..

 و بعد ما اعتقدت إن حالة الوقوف ضد التيار لوحدي خلصت و إن بقه معايا ناس ... لقيت نفسي لوحدي تاني في الصف

و كله بيدورله على صف تاني يقف فيه !!

بس الموضوع دا مش غريب عليّ ... متعودة على كدا... بس افتكرت إنه خلاص العهد دا راح !

بس زي ما العسيلي بيقول ... لو الحياة بطلت تدهشك يبقى انت مش عايش !

و هي دي الحياة !

أنا بـَنـفـَس عن اللي جوايا عشان أقدر أكمل أعيش من غير ما أشيل في نفسي من حد


و سامحوني بقه لو زعلتكم :) 

و ع فكرة أنا مؤمنة بـأن " الرجوع في الحق خير من التمادي في الباطل"

كل واحد له أوقات جنونه و احباطاته .. 

أنا آسفة :(

بس فعلاً يا مصر ... لو عايزة تصالحيني .. رجعيلي الشرعية تاني

رجعيلي أهلي اللي في الميدان لي ... 

هو طلب صعب أوي للدرجة دي كدا ؟!





هناك 3 تعليقات:

  1. رأيك صريح فى اوقات غابت فيها الصراحه....اذا كنتى عايزه تقاطعى و انا معاكى يبقى فكك من جو التهديد و الوعيد ده....محدش قلبه يجيبه انه يقف فى طابوووور طويل و يدى صوته اللى ضيع عين حراره اليمين فى موقعه الجمل او للى ضيع عينه الشمال فى محمد محمود

    ردحذف
  2. قال رسول الله - صلى الله عليه وسلم -
    لا تزال طائفة من أمتي على الحق ظاهرين لا يضرهم من خذلهم ولا من عاداهم حتى يأتي أمر الله وهم على ذلك.
    صدق رسول الله - صلى الله عليه وسلم

    ان فرج الله لقريب

    ردحذف
  3. فين دم الشهيد
    فين دم الشهيد....انا خايف يرجع من جديد
    و اياك تصدقوا المواعيد....ده لحد ما يفلت من الحديد
    جابوا صبى من صبيانه.....و سهلوله كل شىء
    و برغم مصايبه و بياناته ...... احنا بنطنش ألف شىء
    أل ايه نزيهه بدون تزوير......و التزوير فيها بالمشاوير
    و انا نفسى اقول لسيادة المشير...ربك و بس هو الكبير
    ده دم اخويا و ابنى و ابنك... و اللى فاضل من العمر قليل
    و اوعى تفكر فى لحظة انك...مفيش عند ربك ألف دليل
    خايف ليبيا و سوريا يتكرروا...و أهلى و أهلك يتمرروا
    حرام أهالينا يتكدروا....فاضل ايه تانى راح نخسروا
    و اذا كنا بنحكى وبنقول دى مصر...مفيش قدامنا غير النصر
    و فوق الكبير الله أكبر.....و لا نقدر نحكى و لا نستكبر
    و عشانك يا مصر حكونلك شهيد.... و اشوفك حرة من جديد
    انا دمى اهوه هو الوعيد..... لو ما رجعليش دم الشهيد
    و كل مصرى حيصبح شهيد....لو ما شافش نهار جديد
    و لو حيخرج من الحديد.....انا دمى اهوه هو الوعيد
    عرفتوا فين دم الشهيد
    هوما

    ردحذف