الأربعاء، 3 نوفمبر، 2010

بعد مرور شهر و شوية من الدراسة ... موجز قصير !

بسم الله الرحمن الرحيم ...

ازيكم يا جماعة !؟ عاملين ايه !؟

النهارده حبيت أتكلم شوية شويتين عن الدراسة بمناسبة مرور أكثر من شهر و شوية عليها

لو تفتكروا احنا بادئين من يوم 18 سبتمبر هنا في مصر !!

و المصيبة انه مدرستي فترتين فكنت بروح من السبت للخميس و الجمعة بس هو اللي إجازة ...

ظلم !!

T_T


و آدي شوية أحداث من اللي حصلت :

اممممممممممسك ... كوكتييييل  !!

كان يوم ربيعي خريفي عادي ... كان يوم الاثنين الأول في الدراسة ...

كنت أعده في حالي و فجأة التفت على يساري و لقيت واحدة ماسكة كتاب مألوف جدًا و أعده تتكلم مع شوية بنات ورا

و أنا هنا فطيت من مكاني و قلت لها : امسسسسسسسسسسسك حرااااااامي ... اقفي ثابتة و اوعي تتحركي

(أصلا البنت كانت أعده ما قامتش بس لزوم حركات الأكشن!)

أنا : وريني الكتاب دا ... ورهووني

هي : ليه بس ؟ مافيهوش حاجة

أنا : قلت لك وريهوني و انتي ساكتة


قامت البنت رافعة الكتاب قدامي و هي متبته فيه ...

أنا : ممم ... ... كما توقعت !!
عدد كوكتيل 2000

قامت واحدة تانية سألتني : انتي تعرفيه !؟

أنا : آه طبعًا ! 

و طلعت لها من الشنطة قصة (غريم الشيطان) العدد 8 من رجل المستحيل و أنا بقول لها : جبته معايا عشان لو المدرسة مملة و مافيهاش أصحاب أقرأها في الحصص الفاضية !

البنت خطفت القصة و بعدين بعد ما أخدتها و تصفحتها قالت لي : ممكن أقرأها !؟

أنا (لنفسي) : بعد ايه الاستئذان

أما لها فقلت : آه طبعًا ممكن !

و بدأت أكون صداقات مع المجموعة المحبة لروايات مصرية للجيب منذ ذلك اليوم :)


بحر الهزج !!

قبل ما نسمع تريقة و كلام بلاش منه ... لازم تعرفوا انها أول سنة آخذ فيها البلاغة و الأدب و الشعر الجاهلي و خصائصه

و كل الكلام الفاضي دا ... و الموقف دا حصل في حصة العربي ...

مستر العربي : سؤال يا فائقات ... أين يقع بحر الهزج ؟ هل يقع في آسيا أم في أفريقيا أم في أوروبا !؟

البنات عاملين دوشة و بيتكلموا ... أنا بقه تبرعت للإجابة ...

قلت : بما ان دي لغة عربية يبقى يرتبط بالبيئة العربية ... 

و قمت رافعة صوتي و أنا بقول للمستر :
يقع في شبه الجزيرة العربية يا مستر !

(( و أعده أراجع الخريطة في مخي و مش لاقية بحر بالاسم دا خالص بس قلت الإجابة و خلاص !! ))

المستر : شبه جزيرة عربية اييييييييه !! دا بحر شعر !!

أنا : بحر شعر O_o !?

المستر : ما كنتوش بتتفرجوا على سبيس توون ... كانوا بيجيبوا مفاعلة مفاعلة مفاعلة .

أنا : آه ! الحاجات الهبلة دي اللي ملهاش أي معنى ... فكراها فكراها !

المستر : ماهي دي بحور الشعر !!

أنا : و الله العظيم O_o !?

من يومها و مستر العربي و عنترة بن شداد -معرفش ليه- واخدين مني موقف ... تعرفوا حاجة عن الموضوع دا D: !?


زهقانة ... زعلانة ... منك يا مستر !!


من كام يوم مستر الانجليزي نادى على أسامي بعض البنات و بعد ما خلص قال انه اللي ما اتنداش اسمه يبقى مش واخد درجته كاملة في الشفوي...

و طبعًا (أنا المنحوسة) ما اتنداش اسمي !!

فزعلت من المستر و فضلت أعده ساكتة طول الحصة و أعدت أقلب في الصور في كتاب المدرسة D:

(( احتجاج صامت))

المستر جا سألني : What are you busy doing !? Don't lie to me

أنا : أنا موش "بيزي" ... "آي" بتفرج ع الصور ((ماليش نفس أجاوبه بالانجليزي حتى xD))

بعدها بفترة لما خلص شرح الدرس ، سألني مرة تانية ليه أعده ساكتة النهارده 

قمت واقفة و قلت له : أنا زعلانة منك يا مستر !!

قالي : زهقانة مني

أنا (بيني و بين نفسي) : و كمان سمعه بايظ !

أنا له : لأ ... زعلانة زعلانة .

هو : ليه؟!

أنا : عشان حضرتك ما ندتش اسمي في اللي واخدين الدرجة النهائية في الشفوي رغم كل الإجابات اللي بجاوبها في الفصل

هو : يا عبيطة ... كلكم واخدين الدرجة النهائية  ... أنا بس كنت عايز أعرف بعض الوجوه اللي مش حافظ أساميها !

أهم حاجة في الموضوع نفي الصفة XD (موش بيزي يا جماعة و ليست Not busy )


ازيك يا مستر !؟


رغم اني أخدت فرنساوي إلا إن مستر الألماني عارفني و عارفاه ... بسبب الزيارات الكثيرة له لسؤاله عن بعض الكلمات الألمانية 

( الثقافة مقطعة نفسها ! )

و يوم الخميس اللي فات ، جات مسئولة الإذاعة الإنجليزية و أخدتني مع بنت تانية عشان نتدرب على الإذاعة و روحنا أعدنا في المكتبة

قامت شوية بنات جايين المكتبة و شايلين معاهم كتب الألماني ... عندهم حصة دلوقتي !!

المهم ، عملنا شوية قلق للبنات و مستر الألماني و بعدين خلصنا و طلبت مننا المدرسة نروح نجيب بنت من فصل تاني بعد ما الحصة تخلص...

و احنا طالعين من المكتبة : ازيك يا مستر !؟

بعد ما الحصة خلصت ، روحنا استأذنا من مدرسي الانجليزي (التربية العملي) و نزلنا عشان نجيب البنت و لقينا المستر طالع في وشنا

أنا و صاحبتي : ازيك يا مستر !؟

و ما استنناش يرد أصلا و كملنا نزول السلم ... جبنا البنت و بعدها مدرسة الفرنساوي قفشتنا و خلتنا نروح نوصل لها كراسات

لغرفة المعلمات ... خلصنا المشوار و نزلنا قامت واحدة مسكانا تقولنا : خلوا مدرسة الكمبيوتر تمضي على الورقة دي و هاتوهالي دلوقتي بسرعة !

قمنا طالعين بسرعة و مستأذنين تاني من مدرسي التربية العملي و روحنا نمضي الورقة و بعدين صاحبتي قالت لي:

تعالي نفلت من قدام بتوع التربية العملي و ننزل من السلم الثاني .

قلت لها : و من أمام المديرة مباشرة !! يا جرأتك !!

صاحبتي: يا رب ما يقابلنا مستر الألماني تاني بقه !

و احنا نازلين السلم ... لقينا المستر في وشنا ...

أنا : ازيك يا مستر !؟

المستر :

صاحبتي : شكله بيجري ورانا و هيقفشنا !

قلت لها : معاكِ حق ! اجري بسرعة !

و بسرعة جرينا من قدام مكتب المديرة و روحنا سلمنا الورقة و كانوا هيدبسونا في مشوار رابع بس احنا اعترضنا عشان الحصة

و طلعنا نجري للفصل و احنا بنقول : توبة نخرج من الفصل تاني ! اللي خرج من فصله اتقل مقداره !!

و شكل شبح المستر دا ما زال يتجول في المدرسة .... هههه  XD



و دا كان موجز بسيط لبعض الأحداث اللي حدثت لنا في المدرسة خلال شهر D:

نلقاكم في موجز آخر قريبًا .. إلى اللقاء .



هناك 6 تعليقات:

  1. دا انا كنت اموت و القى حد بيقرأ روايات مصرية للجيب في المدرسة ^^"

    لكن ما عنديش حظ ..

    لقيت صديق واحد في الكلية ، و بصراحة حاسس اني محظوظ بيه جدا جدا جدا ^_^

    ( هناك صديق اخر بالمرحلة الابتدئية و الاعدادية ، و هو اللي عرفني على السلاسل .. لكنه توفى الله رحمه ويسامحه ^^

    ---------------

    الحمد لله ، هربت من البحور و الاعراب .. اما عن اللغات ، فما شاء الله تبارك الله .. عربي ، انجليزي ، فرنسي ، و كلمات من الالماني و الياباني P:

    بجرب اتعلم حاجة ان شاء الله اذا ربنا اداني العمر و الذاكرة ^_^

    ردحذف
  2. جاااامدة حكاياتك يا أم حنفي

    ردحذف
  3. استمتعت جدا وأنا أقرأها^^

    بس خسارة خلصت بسرعة^^"

    ماشاءالله .. مدرسة حكومي وبيدرسوكم كل اللغات هذي^^"
    إحنا الإنجليزي والناس حتتجنن هههه
    استفيدي مادامت متوفرة لك^^

    ننتظر مدوناتك لوتشي^^

    ردحذف
  4. أهلاً دكتور عبد الله ^^
    هههههههههه
    فعلا كانوا قراء روايات مصرية خاصة رجل المستحيل و ملف المستقبل نادرات في مدرستي السابقة لكن المدرسة الحالية كتير ماشاء الله ^^
    ((الله يرحم صاحبك))
    و عقبالك لما تتعلم 10 لغات جدد ههههههه

    شكرًا على التعليق الجميل منك يا دكتور :)
    و في انتظار مرورك دومًا

    ردحذف
  5. (حبة البركة) شكرًا يا أم بركات ع التعليق الحلو

    ردحذف
  6. نهلة الرائعة ...شكرًا لتعليقك الجميل و الموضوع خلص بسرعة لأنك رائعة و تحاولين الاستمتاع بكل شيء حولكِ ^^
    أتمنى لكِ السعادة دومًا و شكرًا على نصيحتكِ و تعليقكِ الجميل =)
    في انتظار مرورِكِ دومًا =)

    ردحذف