الاثنين، 31 أكتوبر 2011

عزيزي شهر أكتوبر 2011 ... انــصــرف !!



بدأت شهر أكتوبر بمعنويات مرتفعة ...معنويات تصل إلى أعالي السماء...

و أنهيته في الـ20 من أكتوبر بمعنويات وصلت إلى ما تحت الأرض ...

كنت كل يوم أتجه إلى النتيجة و أنزع تاريخ اليوم و أنا أتنهد ..."بكرا هيخلص"

للأسف ، كانت بداية الشهر مبشرة ، أكتوبر شهر الانتصار العظيم للشعب المصري ...

لابد و أن يمتليء بالأحداث الجميلة التي ستغير حياة المصريين إلى حياة أفضل ...

لكن كل آمالي تبخرت مع شمس الصباح !

الكل تعامل مع الثورة المصرية كأنها ثورة مجمدة ، نضعها في الفريزر و نخرجها عندما نريد ...

و لا عجب ، فنحن نعيش في عصر الدجاج المجمد ..اللحم المجمد ...الخضار المجمد ...الفاكهة المجمدة و حتى الأشخاص المجمدين !

فنحن مجرد أرقام على هواتف المحمول تستيقظ عندما تـُستدعى فقط ... غير ذلك ، فلتظل مجمدة في ذاكرة الهاتف !

" عصر الفريزر" أعتقد ، لذلك كان تعامل المجلس العسكري و مجلس الوزراء و الأحزاب و المنتفعين و المتسلقين و الشعب ذات نفسه 

"غير الثوار طبعًا" على هذا الأساس .

أصبح "الشعب يريد اسقاط النظام" شعار مجمّد ، يخرج فقط عندما تشتد الاحتجاجات على رئيس جامعة لكي يستقيل

و " عيش ...حرية...عدالة اجتماعية" أصبح يستخدم كـحُجة من الفلول لكي يتسلقوا للسلطة مرة أخرى بقولهم "مش دي الديمقراطية

بتاعتكم ؟! " (أحب أقولك إن الديمقراطية دي مش جايباها من البيت معايا و أنا جايه ...يعني مش بتاعتي ! دي بتاعت الناس كلها!)

ثم تتوالى الأحداث ..

مظاهرة كبيرة في جامعة المنصورة ...العميد يرسل بلطجية لضرب الطلبة ... 30 طالب مصاب حصيلة الاشتباكات !

Wait كدا لحظة !

نعم ؟! اشتباكات ... في مسيرة سلمية ... في الجامعة ... على إيد بلطجية !؟؟؟؟؟؟

هل الجامعة مكان للعلم و لا شارع أي حد بيتضرب فيه ؟!

المشكلة أن العمداء من نفس جيل محبي "الفريزر" ...غير قادرين على استيعاب أن هناك ثورة و أن الشباب الذي وقف أمام طلقات

الرصاص و القنابل المسيلة للدموع 18 يومـًا مازال قادرًا على أن يواصل معركته ... هو لا يخشى المواجهة الآن !

المؤمن بقضيته سيذهب لآخر العالم ليثبت صحتها ... لن يكون هناك بين المتظاهرين شخصًا مذعورًا لذلك فإن القمع لن يجدي معهم

و بعد الجامعة ، نذهب إلى اعتصام أمناء الشرطة و المحامين ...

ماذا يحدث في مـصـر ؟!

كنت أتحدث مع سيدة تخطت العقد الخامس من عمرها بسيطة و لم تغادر مصر أبدًا... "يعني مش عميلة ولا حاجة"

و عندما تحدثت عن المادة 18 ، قالت لي ( يعني إيه الكلام دا ؟! يعني القاضي يحبس المحامي و يجي محامي تاني يدافع عن المحامي

يدخل معاه السجن و يجي تالت و يدخل السجن و هكذا ؟! ... ايه  دا ؟! )

لم أعلّق... فهذه السيدة التي لا تفهم في دهاليز القوانين فهمت الأمر بهذه البساطة و كان هذا رد فعلها ، فمابالك برد فعل من يفهم في 

القانون ؟!

ثم نأتي لقضايا الخطف و التعذيب و القتل المتعمّد ، هل نعيش في غابة مثلاً !؟

أكون ماشية في أمان الله و يطلع عليّ ظابط ...و طاخ طاخ ... و خلاص روحت فيها !؟

و يطلع في الآخر مختل عقليًا ؟!

طب و لو هو مريض نفسي ، شايل سلاح ليه و نازل يتعامل مع الجمهور ؟!

و ليه الناس بتتعذب في السجن ؟! هل السجن دا معمول للتقويم و الإصلاح و لا عشان نعاقب الناس ؟!

و بالنسبة للخطف ... إحنا عملنا ثورة عشان المتظاهرين و الشعب يتخطفوا !؟ و مين وراء الخطف ؟! 

يا ترى هيبقى في تحقيق و محاسبة ولا الموضوع هينام !؟

و محاكمات عسكرية للمدنيين (آخرهم الرفيق علاء سيف)

و ... و بعدين يعني !؟ 

مفيش أمن يعني مفيش انتخابات كويسة يعني مفيش ديمقراطية يعني مفيش مصر حلوة و جميلة و متقدمة ...يعني فيه ثورة تانية !

ما احنا مش هنعيش كدا !

يا نعيش بكرامة يا نموت شهداء !

احنا دخلنا في منطقة "اللارجعة" ... و أرجوك يا شهر أكتوبر ارحل ارحل !




-----------------------------------------

لو فاضي كدا و رايق ، ياريت تتفرج على التلات حلقات دول (مش هياخدوا من وقتك أكتر من ساعة و تلت) :

محاكم 1 ، 2


السجن

هناك 6 تعليقات:

  1. راااااااااااااااااااائع
    عندك حق انا معاااااااااااااك
    ياااااااااااريت كل عام 2011 يرحل بسرعة انا تعبت

    ردحذف
  2. صحيح اللى حصلنا من بعد الثورة يحبط اتخنها متفائل فى العالم .... لكن اللى حسيناه ايام الثورة يملا كل متشائمين العالم تفاؤل
    انا عارف انك مش متشائمه ... وعارف ان بكره احسن
    مش بضحك على نفسي
    لكن هى دى الحقيقه .. زى مانتى قولتى احنا دخلنا في منطقة "اللارجعة"

    يانعيش عيشه فل يا نموت احنا الكل :D

    مستنى فجر جديد ليوم جديد الاقى فيه بلدى بتاعتى

    بس الفجر دا إتأخر أوي

    ردحذف
  3. أنا مش عايز أصدمك يا سارة
    بس للأسف كل مرة أكتشف إننا غلطنا مرتين : مرة أما خلينا ثورتنا سلمية من بعد قضائنا على أقسام الداخلية يوم 28 يناير .. و مرة أما سبنا الميدان نهار يوم 12 فبراير و كسناه و روحنا من غير ما نقضى على النظام زى ما الليبيين عملوا ..

    تحياتى
    عصام منصور

    ردحذف
  4. ها هى المشكلة مش فى أكتوبر ، المشكلة فينا إحنا زى الشاعر ما قال
    نعيب زماننا والعيب فينا * وما لزماننا عيب سوانا
    ونهجو ذا الزمان بغير ذنب * وإذا نطق الزمان لنا هجانا

    ردحذف
  5. المشكله مش فى اكتوبر
    المشكله فى السنادى كلها
    فيها احداث اكبر بكتير من اننا نستوعبها
    سواء على المستوى المحلى او العربى
    للاسف لو فى يوم حصل حاجه خلتنا ندى نفسنا شويه تفائل
    بيجى اليوم اللى بعده يحصل فيه حاجه تضيع الاحساس ده تماماً

    ردحذف
  6. أحمد الحطاب1 نوفمبر 2011 4:59 م

    - شهر أكتوبر اللي كان المفروض اسمه شهر العظماء ( باستثناء ان أنا اتولدت فيه يعني) تحول لشهر الكوارث والأحداث المؤ سفة ... عادي هي سنة 2011 كده كل حاجة فيها غريبة .


    - مش الغريب ان شهر أكتوبر ماتحققش فيه انجاز أو مفهوش أخبار حلوة لأ ده العادي من كل شور السنة من أول شهر مارس .. الغريب بس ان اتجمع فيه كمية أحداث صاخبة ومحزنة آخرها حبس علاء عبد الفتاح امبارح .


    - آه بالمناسبة سمعت ان طنطاوي مواليد 31 أكتوبر زي النهارده يعني .. جايز دي سخرية القدر ان شهر أكتوبر جه مليان كوارث كده .. عشان الناس تربط بين حكم العسكر وبين الكوارث علي طريقة هتلاعبني بالأرقام .


    - وياريت تكون الأحداث المؤسفة ليها علاقة بشهر أكتوبر تحديدا .. لأن لو تدويناتك عن شهر 11 و12 كانت عن أحداث مؤسفة برضه هتبقي مشكلة لأن غالبا الأحداث دي هتكون متعلقة بالانتخابات .

    - تشبيه الثورة بانها مجمدة وموضوعة في الفريزر ده تشبيه جميل .. عمر طاهر كتب في مقال مرة تشبيه قريب له .. قال ان المجلس العسكري بيتعامل مع الثورة بطريقة حلة الخضار التي لا سبيل لحفظها الا وضعها في التلاجة .. وكلما يجوع الثوار يقوم المجلس بتسخين بعض محتويات الحلة ويلقيه لهم .


    - يعني المجلس فشل في التعامل مع الثورة .. هل لان طبيعته العسكرية ضد التغيير بالأساس ولا لأنه ضد الثورة دي تحديدا ؟؟ بلاش نجاوب نسيب الأيام تجاوب أحسن .


    - لما حد بيقولي انت متفائل ليه .. بقوله ببساطة لأن "عزائي الوحيد أن الأمور لا يمكن أن تسوء أكتر من ذلك " أو بالبلدي يعني " هيجري ايه أكتر من اللي جري" .. المشكلة ان الأمور بتسوء فعلا .. وبيجري أكتر من اللي جري فعلا .. وبرضه يبقي " التفاؤل هو الحل " بس مع كثير من التعقل ومع كثير من الاصرار ....

    ردحذف