الخميس، 4 أغسطس، 2011

شوية ملاحيظ على المحاكمة ... هيب هيب !



الحمدلله توقعاتي طلعت غلط و ما قطعوش علينا ماية و نور و نت و هوا ... و تويتر !!
و كمان تقريبًا المستشفيات ما استقبلتش حالات تسمم !
و تقريبًا دا كان مبارك فعلاً مش حد شبهه و لا حاجة ! ((ما عليكم من الراجل بتاع مبارك مات من 2004 دا...شكله شاف مسرحية الزعيم كتير و اتأثر بيها جدًا))
بس احنا لسه في الأول ... يعني ما تفرحوش أوي ... عارفين طبعًا إن الفرحة في مصر وحشة و عادةَ بتقلب بـغــم !!
و بعيدًا عن ذلك ، هناك بعض الملحوظات التي أود أن أشارككم بها عن المحكمة و هي للعلم تم الإشارة إليها من قبل الجميع تقريبًا ... لكن لازم أتكلم و أدلي بدلوي كأي مصري صميم بيحب يفتي ... هيب هيب !

1)    الأستاذ المحامي جمال عيد قال قبل المحكمة بيوم في برنامج (آخر كلام) مع الإعلامي المتميز المحترم (يسري فوده) إن المفروض تـُضم القضية الحديثة "قضية مبارك" إلى القضية القديمة "قضية العادلي" فعشان كدا يا ريت حد محامي شاطر يوضح لنا الموضوع دا ...عشان مش بعد كل المجهود دا المحكمة تقولك (فــركــش) بسبب خطأ قانوني !!
2)    لو كنت بكتب المحاكمة دي في دراما من خيالي ، كنت هختار فريق محامين منسق و رهيب يثير الرعب في قلوب المتهمين و دفاعهم بقوة التنسيق و الاستراتيجية التي يسيرون بها في القضية و لكن في عالم الواقع اتصدمت بكتيبة محامي الشهداء متفرقة ... متشتتة .
معلش بقه استحملوني واحدة متعودة على محاكمات مسلسل The Good Wife . أنا عايزة يكون في تنسيق بين محامي الشهداء ما ينفعش الهرجلة دي تكون في صف الحق !!
3)    كتب يسري فودة على تويتر إن الأمن منعه من دخول قاعة المحكمة هو و روبرت فيسك الكاتب الصحفي البريطاني رغم حصوله على التصاريح و في نفس الوقت منعوا دخول أحد المحامين المسئول و الموكل عن 130 شهيد و مصاب ... فهل يا ترى هذه مؤامرة ؟ هل هي مقصودة لإحراج أهالي الشهداء و هرجلة القاعة ؟! أتمنى أن يكون كلامي غير صحيح و المشكلة دي تتحل بسرعة !
4)    إزاي أحد أفراد الشرطة العسكرية يسلم على العادلي و هو رايح عربية الترحيلات ؟ أتمنى إلا تكون حركة العادلي المقصود منها إحراج الشرطة العسكرية و أتمنى تكون حركة الرد على السلام عفوية من الضابط غير المعتاد على مثل هذه المحاكمات و تأمينها و أنتظر اعتذار من لجنة التأمين على هذه الحركة المستفزة لمشاعر الجماهير !

أعتقد أن هذا كل ما لدي حتى الآن من ملحوظات و أنتظر وجود محامي شاطر لغير المختصصين في القانون يشرح ما يحدث حولهم – و إن كنت أعتقد أن غالبية الشعب المصري تفهم في القانون بسبب كمية القضايا التي يرفعونها كل يوم – و أنتظر الأسماء الـبرّاقة التي أزعجتنا و تزعجنا في التلفاز بكلامهم عن القانون و تطبيقه و أولئك الذين أزعجونا بتقديم بلاغات ميكي ماوس ذو اللحية أنتظر أن يزعجونا بحضورهم إلى المحكمة و الدفاع عن حق الشهداء و المصابين في الثورة التي استفدتم منها أنتم ... و أظن أن هذا خير للإسلام أيضًا بل أكثر من خير بلاغ ميكي ماوس ! 

هناك 8 تعليقات:

  1. ملاحظات طبيعية جدا
    ويا ريت نفرح ان احنا شوفناه في القفص كام القرد يلعبفي مراخينه
    وابشري هناك الان هيئة منظمة للدفاع عن اهالي الشهداء

    ردحذف
  2. معاكى حق و الله يا سووو !!
    بالنسبة لموضوع يسرى و روبرت فده غاظنى جدا
    الى جانب أنهم ميسمحوش لمحاميين الشهداء أنهم يدخلوا
    و يجيبولى شوية مهرجين و واحد يقول اعملوا تحليل DNA حالا
    و أا عايز الميكروفون .. دول مينفعش أسميهم محاميين !!
    بس برضة عندى امل ان شاء الله بجد أنهم يحكمو عليه بحاجة محترمة !!

    ردحذف
  3. aMr saYed @ طبيعية ؟ طب الحمدلله أنا لسه عاقلة أهو :D أمال الناس بتشككني في نفسي ليه طيب ؟XD
    الحمدلله انه في هيئة منظمة !
    أتمنى تستمر =)

    أشكرك على المرور و الرد أستاذ عمر و أتمنى ما تحرمنيش من زيارتك لي على طول في المدونة :D

    ردحذف
  4. Radwa Ashraf @ فعلا شوية مهرجين ! معاكي حق
    أملي في ربنا كبير و ثقتي في القضاء الإلهي عميقة جدًا و الحمدلله =)
    ربنا هينصرنا ان شاء الله و هيبين الحق !

    أشكرك على المرور و التعليق الجميل دا ما تحرمينيش من زيارتك على طول يا رودي :)

    ردحذف
  5. كلامك كله صح ميه فى الميه بجد

    انا بردو مش عجبنى حكايه الفوضى دى وانهم مش مرتبين نفسهم

    العادلى انا حساه بيستفزنا مش عارفه ليه !!

    ربنا يكملها على خير وتكون بفايده ان شاء الله

    ردحذف
  6. Bent Men ElZaman Da !! @ العادلي انسان مستفز فعلاً !!
    استغفر الله العظيم يا رب منه ! يارب ياخد إعدااااااااااااااااااااااااااااااااام !!

    يارب آمين يا رب و ان شاء الله خير

    أشكرك على المرور و التعليق الجميل جدًا دا يا دينا =)
    ما تحرمينيش من زيارتك لي على طول ^.^

    ردحذف
  7. ملاحيظ فى اللذيذ

    ردحذف
  8. غير معرف @ أشكرك =)
    ما تحرمينيش من زيارتك لي على طول و ردودك المبهمة دي بالأسماء المبهمة دي :D

    ردحذف