الاثنين، 1 أغسطس، 2011

رسالة للمجلس العسكري : أشكركم على حرقة الدم !

كان المفروض التدوينة الأولى تكون عن شهر رمضان ... و عن أيام شهر رمضان

 و أول يوم صومت فيه و كل الأحلام و الروحانيات الجميلة دي ...

بس صحيت من كام ساعة كدا ع خبر كارثة !!

عناصر من الجيش و الأمن المركزي تفض اعتصام ميدان التحرير بالقوة !

كنت بجري تقريبًا في الشقة ... من التليفزيون للموبايل لتويتر ...

و كنت بتنطط و بشد في شعري و بقول (اللهم إني صائمة...اللهم إني صائمة)

و اتحرق دمي !!

اتحرق بمعناه الحرفي !!

حاسه إنه في شياط طالع من عروقي  ...

و تويتر اللي كان 3 تويتات في الدقيقة بقه بيوصل لـ12 فجأة

الدنيا والعة !

و انتو تقولولي بلطجية ؟!

الدنيا والعة و تقولولي عجلة إنتاج !!

طب ايه رأيكم بقه ...إن 99% من محلات المنصورة و مصالحها مقفولة النهارده !؟؟

يعني أصلاً مفيش شغل كدا كدا ... و انتو تقولولي أصل عجلة الانتاج ... خلاص يا حلوين ...

أنا هكلم معتصمي التحرير و أخليهم يأجروهالكم في العيد !!

العدد في الاعتصام قليل مش بالدرجة اللي تقفل المرور ...

الخيام مش عاملة مشكلة ...

الزحمة طول عمرها موجودة في القاهرة ...

البلطجية في الاعتصام كان ممكن يبقى رد الفعل معاهم ما يبقاش بالصورة دي !!

للناس اللي مش عاجبها الاعتصام ...

عايزة أسألكم سؤال ...

هو مبارك اتحاكم ؟! (اتحاكم مش جملة "هيتحاكم")

هو انتو حسيتوا بالتغيير ؟!

شوفتوا العادلي بياخد إعدام ؟!

طب شوفتوا محاكمة عادلة للظباط المتهمين؟!

هل قبضتم الحد الأدنى و الحد الأقصى من الأجور ؟!

هل حاسين انه الشرطة اتطهرت و اتغيرت ؟!

حاسين انكم ما عدتوش بتدفعوا رشوة عشان تخلص لكم مصلحة ؟!

هل انتهت كلمة ( تعالا بكرا) من قاموس الموظف الحكومي ؟!

هل الأسعار بقت في متناول يديكم ؟!

ما تقولوليش سيبوهم يشتغلوا ... المجلس العسكري مصري زي أي مصري ...

لازم حد يديله فوق دماغه عشان يكمل شغل !

لما الجيش استسهل خد على دماغه في 67 ... و لما اشتغل صح و كان في واحد فوق دماغه كسب 73

و لما فضلنا في الميدان الـ18 يوم ... خلعنا مبارك !

و لما بتزن فوق دماغ حد مصري بيحقق لك اللي انت عايزه !

البلد دي لسه ما تغيرتش ... لسه عايزة حد يقف فوق دماغها عشان يشتغل صح !

و احنا مش هنسكت ... و اللي حصل النهارده في التحرير هيخلي اللي مش عايز ينزل ينزل ...

و أخيرًا للمجلس ...

شكرًا على حرقة الدم في أول يوم رمضان !

فرقتوا ايه عن بشار الأسد ؟

هناك 6 تعليقات:

  1. ياريتها على قد حرقة الدم بس !!
    أكيد سمعتى عن التهليل و الفرحة لأصحاب المحلات فى التحرير
    تقوليش اللى كانوا بيعتصموا دوول ارهابيين .. أو مش مصريين .. او مش بيطالبوا بحقوق للبنى أدميين دول
    لو كنا مشينا مكنش مبارك مشى و لو استسلمنا دلوقتى هنلاقى مبارك بيحكم غصب عننا و من شرم !!

    ردحذف
  2. كل عام وانت بخير وربنا يبعد عنك حرقة الدم يارب ..ويهدي بالكم ويريح اعصابكم ويحفظ لكم مصر الحبيبة ..

    سعيدة بتعرفي على مدونتك وبالتوفيق في الحملة ..وان شاء الله من المتابعين لكل جديد ..

    دمت بخير.

    ردحذف
  3. Radwa Ashraf @ آه ... كأن الناس اللي اتضربت دي مش مصريين !!

    بجد أنا زهقت منهم =(

    ربنا يستر

    تسلمي يا رضوى ع المرورو و التعليق الجميل =)

    و تابعيني يوميًا أكيد ^.^

    ردحذف
  4. خلعنا مبارك والعادلى عشان ماكنش لينا حق التظاهر
    ودلوقتى جه دور المجلس العسكرى اللى بيسلب مننا حق التظاهر

    اقول رأيي بحريه فين لما انا مش عارف اقوله فى بلدى واحنا لسه فى الثورة
    اروح افغانستان بقى

    ردحذف
  5. وجع البنفسج @ كنت أتساءل عن اسمكِ الأليم ثم وجدت انكِ من فلسطين الجريجة =(

    أعانكم الله ... هنخلص الثورة اللي في ايدنا دي و هنيجي لكم ع طول :D

    أنا أسعد =)

    أشكركِ على المرور و التعليق الجميل دا

    و أنتظر متابعتكِ اليومية لي =)

    ردحذف
  6. تاكاشى @ احنا هنقلع ملط بعد كدا XD

    أنا زهقت خلاص ... احنا مكملين و الثورة مستمرة ان شاء الله ...

    أشكرك على المرور و التعليق الجميل =)

    و أنتظر متابعتك اليومية لي ^^

    ردحذف